काठमाडाैं । संसद सचिवालयकी महिला कर्मचारीलाई याैन दुर्व्यवहार गरेको अभियोग लागेका निवर्तमान सभामुख कृष्णबहादुर महराले सफाइ पाएका छन् । जिल्ला अदालतका न्यायाधीश अमरराज पौडेलको इजलासले उनलाई निर्दोष ठहर हो ।
न्यायाधीश पौडेलको इजलासमा आइतवार सुनुवाइ सकिए पनि समय अभावकाे कारण देखाउँदै फैसला सुनाइएकाे थिएन ।
आइतबार हेर्दाहेर्दैमा राखिएको मुद्दाको फैसला सुन्न महरा साेमबार बिहानै अदालत पुगेका थिए । आइतबार काठमाडाैँ जिल्ला अदालतमा महराको तर्फबाट अभिवक्ताहरु भीमार्जुन आचार्य, शेरबहादुर केसी, रमन श्रेष्ठ, लव मैलानी, मुरारी सापकोटा लगायत ८ जना वकिलले महराको तर्फबाट बहस गरेका थिए ।
२६ माघमा जिल्ला अदालतमा मुद्दाको अन्तिम फैसलाका लागि सुनुवाइ सुरु भएको थियो । सरकारी वकिल कार्यालयको तर्फबाट भने यसअघि नै बहस सकिएको थियो ।
सरकारी वकिल कार्यालयका तर्फबाट सहन्यायाधिवक्ता चन्द्रकान्त खनाल, जिल्ला न्यायाधिवक्ता उमाकान्त पौडेल, जिल्ला न्यायाधिवक्ता हरिप्रसाद रेग्मी र उपन्यायाधिवक्ता बिनिता कपालीले बहस गरेका थिए ।
संसद सचिवालयकी महिला कर्मचारीलाई बलात्कार प्रयास गरेकाे अभियोगमा गत असोज १९ गते पक्राउ परेका महरालाई जिल्ला अदालत काठमाडौँले पुर्पक्षका लागि थुनामा पठाएको थियो।
जिल्ला अदालतले थुनामा पएपछि महराले उच्च अदालत पाटनमा पुनरावेदन दिएका थिए । तर, उच्च अदालतले जिल्लातकै आदेशलाई सदर गर्दै १ महिनाभित्र फैसला गर्न आदेश गरेकाे थियाे ।
उनीविरुद्ध जबरजस्ती करणी प्रयासमा ५ वर्ष र सार्वजनिक पद धारण गरेर कसुरको प्रयास गरेको भन्दै थप साढे २ वर्ष गरी साढे ७ वर्ष कैद सजाय माग गर्दै मुद्दा दायर गरिएकाे थियाे ।
प्रकाशित मिति: सोमबार, फागुन ५, २०७६
-1732776560.jpg)
