नवलपरासी । पूर्वी नवलपरासीमा ट्याक्टर दुर्घटना हुँदा एकै गाउँका ४ जनाको मृत्यु भएको छ भने अन्य ८ जना घाइते भएका छन् ।
पूर्वी नवलपरासीको बुलिङटार गाउँपालिका ३ छरछरे भन्ने स्थानमा मंगलबार साँझ लु ४ त २५५६ नम्बरको ट्याक्टर छरछरेबाट बुलिङटार जाने क्रममा दुर्घटनामा परेको हो ।
दुर्घटनामा परी बुलिङटार गाउँपालिका ३ निवासी २२ वर्षीय नरबहादुर सुस्लिङ, ५९ वर्षीय यमान सिंङ सुस्लिङ, ४० वर्षीय पूर्णबहादुर थापा र २५ वर्षीय लिलाबहादुर सारुको ज्यान गएको जिल्ला प्रहरी कार्यालय नवलपुरले जनाएको छ ।
दुर्घटनामा घाइते भएकामध्ये ट्याक्टर चालक तथा ट्याक्टर धनी बुलिङटार ३ निवासी बलबहादुर झेडी मगरको अवस्था गम्भीर रहेको प्रहरीले जनाएको छ ।
दुर्घटनामा घाइते भएकाहरुको पुरानो मेडिकल कलेज चितवनमा उपचार भइरहेको छ । दुर्घटनाको कारण भने खुल्न सकेको छैन ।
प्रकाशित मिति: बुधबार, माघ २९, २०७६
