बिबिसी । चीनमा फैलिएको नयाँ कोरोना भाइरसको सङ्क्रमणले ज्यान जानेको सङ्ख्या ८०० नाघेको छ । करिब २० वर्ष अगाडि सार्स भाइरसको सङ्क्रमण फैलिँदा मर्नेकाे सङ्ख्यालाई कोरोना भाइरसबाट मर्ने संख्याले उछिनिसकेको छ ।
सन् २००३ मा सेभेर अक्युट रेस्पिरेटोरी सिन्ड्रोम वा सार्स भनिने भाइरसको सङ्क्रमणबाट विश्वभरका २ दर्जन देशमा ७ सय ७४ जनाको ज्यान गएको थियो ।
सार्सभन्दा कम घातक ?
कोरोना भाइरसले चीनको हुबेइ प्रान्तमा मात्र ७ सय ८० जनाको ज्यान लिएको छ भने कुल मारिनेको सङ्ख्या ८ सय ३ पुगेको छ । तीमध्ये १ जना मात्र चीन र हङ्कङभन्दा बाहिरका व्यक्ति हुन् ।
तर नयाँ कोरोना भाइरसबाट मृत्यु हुनेको अनुपात भने सार्सभन्दा निकै कम छ । नयाँ कोरोना भाइरसले ३४ हजार ८ सय मानिस सङ्क्रमित भइसकेका छन् । गत महिना विश्व स्वास्थ्य संगठन डब्लुएचओले यसलाई विश्व जनस्वास्थ्य संकटको घोषणा गरेको थियो ।
कोरोना भाइरसको पछिल्लो अवस्था
डब्लुएचओले भाइरस सङ्क्रमणबाट अत्यधिक प्रभावित चिनियाँ क्षेत्रहरूमा त्यसका नयाँ सङ्क्रमणका घटना अलिकति स्थिर हुन थालेको बताएको छ । तर अहिले नै अब भाइरस सङ्क्रमणको वृद्धि दर रोकिने वा पुन: बढ्नेबारे बताइहाल्ने अवस्था नरहेको बताइएकाे छ ।
आफ्नो पछिल्लो बुलेटिनमा हुबेई प्रान्तका स्वास्थ्य अधिकारीहरूले शनिबार थप ८१ जनाको ज्यान गएको उल्लेख गरेका छन् । २०१९ एनसिओभी नाम दिइएको उक्त भाइरस पहिलोपटक हुबेईको राजधानी वुहानमा देखा रेको थियो । सो सहरलाई हप्तौँदेखि सार्वजनिक आवागमन रोकेर एक्ल्याइएको छ ।
प्रकाशित मिति: आइतबार, माघ २६, २०७६
-1732776560.jpg)
