काठमाडौं । रुपन्देहीको रोहिणी गाउँपालिकामा ३ ट्रक आपसमा ठोक्किँदा ३ जनाको मृत्यु भएको छ । मंगलबार बिहान करिब ६ बजेतिर भएको दुर्घटनामा दुवै ट्रकका चालकसहित ९ जना घाइते भएका छन् ।
भैरहवादेखि परासीतर्फ जाँदै गरेको लु १ ख ६७४५ नम्बरको ट्रक परासीदेखि भैरहवातर्फ आउँदै गरेको ना २ ख ८४८१ र ना ५ ख ७८५६ नम्बरको ट्रक आपसमा ठोक्किएर दुर्घटना भएको बताइएको छ ।
दुर्घटनामा परी मृत्यु हुनेहरुमा नवलपरासी पाल्हीनन्दन गाउँपालिका वडा नम्बर ७ बस्ने लालु कुर्मी र मविकन कुर्मी र सुनसरीकाे चतरा बस्ने पूर्णबहादुर भुजेल छन् ।
घाइतेमध्ये ४ जनाको अवस्था गम्भीर छ भने अन्य ५ जना सामान्य घाइते भएका छन् । भैरहवास्थित भीम अस्पताल र युनिभर्सल मेडिकल कलेजमा घाइतेहरुको उपचार भइरहेको प्रहरीले जनाएकाे छ।
अत्यधिक कुहिरोका कारण ट्रक आपसमा ठोक्किँदा दुर्घटना भएको हुन सक्ने प्रहरीले जनाएको छ ।
प्रकाशित मिति: मंगलबार, माघ १४, २०७६
