विराटनगर । विराटनगरस्थित लर्ड बुद्ध कलेजको बस दुर्घटना हुँदा १ जनाको मृत्यु भएको छ भने अन्य ११ जना विद्यार्थी घाइते भएका छन् ।
बिहीबार बिहान विद्यार्थी बोकेर रंगेलीबाट विराटनगर आउँदै गरेको बस दुर्घटनामा परेको हो । बिहान साढे ६ बजेतिर मे १ ख १४९० नम्बरको बस धनपालथान गाउँपालिका–६ रामचोकमा दुर्घटनामा परेको थियो ।
बस अनियन्त्रित भएर पल्टिँदा सहचालक तथा बसका मालिकसमेत रहेका विराटनगर–१५ का सानुकुमार साहको मृत्यु भएको हो ।
बाक्लो हुस्सुका कारण स्कुल बस घुम्तीमा अनियन्त्रित भई दुर्घटना भएको इलाका प्रहरी कार्यालय रंगेलीका प्रहरी निरीक्षक लेखनाथ दाहालले बताए ।
घाइते हुनेमा धनपालथान गाउँपालिका ४ बस्ने २० वर्षीया सुस्मा राजवंशी, १९ वर्षीया दीक्षा श्रेष्ठ, धनपालथान ७ बस्ने २० वर्षीया रन्जीता मण्डल, धनपालथान ६ बस्ने नीकिता कुमारी राय , रंगेली नगरपालिका ४ की २० वर्षीया नुना गौतम र रंगेली २ बस्ने १८ वर्षीय स्वस्तिका कटुवाललगायत छन् । उनीहरुको न्युरो अस्पतालमा उपचार भइरहेको छ । घाइते सबैकाे अवस्था सामान्य रहेकाे बताइएकाे छ ।
प्रकाशित मिति: बिहीबार, माघ ९, २०७६
