काठमाडौँ । कार दुर्घटनामा परी गजल गायक निशान भट्टराईको मृत्यु भएको छ ।
दरबारमार्गस्थित बानथाई रेस्टुरेन्टबाट निवास फर्कने क्रममा आफैंले चलाएको कार तीनकुनेस्थित सडकको पोलमा ठोक्किएर दुर्घटना भएको थियो । जसमा भट्टराई गम्भीर घाइते भएका थिए । लगत्तै उनलाई उपचारका लागि ट्रमा सेन्टर लगिएकोमा त्यही उनको निधन भएको हो ।
उनको शवलाई पोस्टमार्टमका लागि टिचिङ अस्पताल लगिएको छ । वरिष्ठ संगीतकार मिलन मोक्तानका अनुसार उनको पशुपति आर्यघाटमा मंगलबार दिउँसो १ बजे अन्त्येष्टि गरिँदै छ ।
गजल गायकीका कारण निकै चर्चित भट्टराई स्टेजलगायत पाँचतारे होटल तथा रेस्टुरेन्टमा हिन्दी, नेपाली तथा गजल गाउँदै आएका थिए । उनी दरबारमार्गस्थित बानथाई रेस्टुरेन्टका सञ्चालकसमेत थिए ।
प्रकाशित मिति: मंगलबार, पुस २९, २०७६
