बाँके । चट्याङ लागेर बाँकेमा एकै परिवारका ५ जना घाइते भएका छन् । शुक्रबार बिहान पौने ५ बजेतिर चट्याङ पर्दा एकै घरका ५ घाइते भएको प्रहरीले जनाएको छ ।
जिल्ला प्रहरी कार्यालय बाँकेका प्रहरी प्रमुख प्रहरी उपरीक्षक वीरबहादुर ओलीका अनुसार नेपालगन्ज–१३ महापुरवाका ५४ वर्षीय गुरुदिन खटिकको घरमा चट्याङ पर्दा गुरुदिनसहित ५ जना घाइते भएका हुन् ।
चट्याङ लागेर ५५ वर्षीया श्यामकला खटिक, ४५ वर्षीय राजितराम खटिक, १८ वर्षीय रामरुप खटिक र ४ वर्षीय सुबी खटिक घाइते भएका हुन् ।
चट्याङ लागेर घाइते भएका उनीहरु सबैको नेपालगन्जस्थित भेरी अस्पतालमा उपचार भइरहेको प्रहरीले जनाएको छ । चट्याङ लागेर गुरुदिनले पालेको एउटा बङ्गुरसमेत मरेको प्रहरीले जनाएको छ ।
प्रकाशित मिति: शुक्रबार, पुस १८, २०७६
