काठमाडाैं । हत्या गरेकाे अभियाेगमा अदालतले सिन्धुलीमा एक १५ वर्षीय किशाेरलाई जन्मकैदको फैसला गरेकाे छ । जिल्ला अदालत सिन्धुलीले हत्या अभियोगमा पक्राउ परेका किशाेरलाई जन्मकैदको फैसला गरेको हो ।
अदालतले मरिण गाउँपालिका-१ आहालेकी १३ वर्षीया छलिमाया मोक्तानको हत्यामा संलग्न बालकलाई जन्मकैदको फैसला सुनाएको हो । उनलाई जन्मकैद हुने र नाबालक देखिएकाले जन्मकैदको आधा १४ वर्ष १० महिना ७ दिन कैद हुने फैसला अदालतले गरेको हो ।
जिल्ला न्यायाधीश किरणप्रसाद सिवाकोटीको एकल इजलासले उक्त फैसला गरेको हो । छलिमायासँग यौनप्रस्ताव राख्दा अस्वीकार गरेपछि उनले असोज २ गते हत्या गरेका थिए। बालिकाको घर नजिकैको जंगलमा रहेको खोल्सामा बालिकाको हत्या भएको थियो।
असोज ३ गते घाँटी निमोठी, घाँटी थिची हत्या गरिएको अवस्थामा छलिमायाको शव फेला परेको थियो । छलिमायाको हत्या अभियोगमा बालकलाई असोज ४ गते मरिणको कपिलाकोटबाट प्रहरीले पक्राउ गरेको थियो ।
बालकलाई गत असोज ५ गते सिन्धुली जिल्ला अदालतबाट म्याद थप गरी प्रहरीले थप अनुसन्धान गरेकोमा असोज १० गते अदालतले पुर्पक्षका लागि बाल सुधारगृह सानोठिमी भक्तपुरमा राख्न आदेश दिएको थियो ।
बालक १८ वर्ष पूरा नभएसम्म बाल सुधार गृह सानोठिमी भक्तपुरमै रहने र त्यसपछि कारागारमा कैद भुक्तान गर्ने सिवाकोटीले बताए ।
प्रकाशित मिति: बिहीबार, पुस १७, २०७६
-1732776560.jpg)
