काठमाडाैं । नेपाल पुलिस क्लबले संकटा क्लबलाई पराजित गर्दै शहीद स्मारक ए डिभिजन लिग फुटबलमा दोस्रो जित दर्ता गराएको छ ।
ललितपुरको सातदोबाटोस्थित एन्फा कम्प्लेक्सको खेल मैदानमा बुधबार भएको खेलमा विभागीय टोली पुलिसले संकटा क्लबलाई २–१ गोल अन्तरले पराजित गर्दै लिगमा दोस्रो जित दर्ता गराएको हो । जितसँगै पुलिसले ४ खेलमा ७ अंक जोड्दै अंक तालिकाको पाँचौँ स्थानमा उक्लिएको छ ।
पुलिसको जितमा दुवै गोल सुमन लामाले गरे । खेलको १५औँ मिनेटमा सुमनले गोल गर्दै पुलिसलाई पहिलो अग्रता दिलाएका थिए । त्यस्तै खेलको १८औँ मिनेटमा संकटाका अमित तामाङले पेनाल्टीमार्फत १ गोल फर्काउँदै खेललाई १-१ गोलको बराबरीमा ल्याए । पुलिसका डिफेन्डरले डिबक्स एरियाभित्र ह्यान्ड गरेपछि संकटाले पेनाल्टी पाएको थियो ।
खेलमा १-१ गोलको बराबरी भने लामो समयसम्म टिक्न सकेन । खेलको ३३ औँ मिनेटमा सौजन राईको पासमा पुलिसका सुमनले व्यक्तिगत दोस्रो गोल गर्दै पुलिसलाई २–१ को जित दिलाए ।
खेलमा सुमन लामा म्यान अफ दि म्याच घोषित भए । पराजित संकटाले ४ खेलमा ४ अंक जोडेको छ । संकटा अंक तालिकाको दसौं स्थानमा छ । रासस
प्रकाशित मिति: बुधबार, पुस १६, २०७६
