काठमाडौँ । बसले ठक्कर दिँदा चाबहिलस्थित पशुपति बहुमुखी क्याम्पसमा बिबिएसमा अध्ययनरत सृष्टि पन्तको मृत्यु भएको छ ।
सुकेधारा चोक नजिक बाटो पार गर्ने क्रममा २१ वर्षीय पन्तलाई भक्तपुर–नयाँ बसपार्क रुटमा चल्ने बा ४ ख ५९२० नम्बरको बसले बिहान साढे ५ बजेतिर बजे ठक्कर दिएको थियो ।
बसको ठक्करबाट गम्भीर घाइते भएकी पन्तको उपचारका क्रममा ओम अस्पतालमा मृत्यु भएको महानगरीय प्रहरी वृत्त गौशालाले जानकारी दिएको छ । चालकलाई प्रहरीले नियन्त्रणमा लिएको छ ।
बसको ठक्करबाट सहपाठीको मृत्यु भएपछि आक्रोशित बनेका पशुपति बहुमुखी क्याम्पसका विद्यार्थीले बा ४ ख ७१०१ नम्बरको बसमा आगजनी गरेका छन् । उक्त घटनापछि चाबहिल, सुकेधारा र मित्रपार्क क्षेत्रमा यातायात सञ्चालनमा केही समय अवरोध भएको थियो ।
प्रकाशित मिति: सोमबार, पुस ७, २०७६
