काठमाडाैं । रोजगार अनुमति प्रणाली (इपीएस) अन्तर्गत सीप परीक्षणको नतिजा सार्वजनिक भएको छ । सीप परीक्षणमा ६ हजार ७ सय ७३ जना नेपाली प्रशिक्षार्थी उत्तीर्ण भएको इपीएस कोरिया शाखाले जनाएको छ ।
यसमध्ये १ हजार ३४ महिला र ५ हजार ७ सय ३९ जना पुरुष छन् । इपीएस अन्तर्गत लिइएको कोरियन भाषा परीक्षामा ९२ हजारभन्दा धेरै परीक्षार्थी सामेल भएका थिए ।
यसमध्ये भाषा परीक्षामा १२ हजार १० जना उत्तीर्ण भएका थिए । भाषा परीक्षामा पास भएकामध्ये सीप परीक्षणमा चाहिँ ६ हजार ७ सय ७३ जना मात्रै उत्तीर्ण भएका शाखाले जनाएको छ ।
उत्पादन क्षेत्रमा ४ हजार ७ सय ६४ र कृषि क्षेत्रमा २ हजार ९ जना सीप परीक्षामा उत्तीर्ण भएका छन् । सीप परीक्षा पास हुँदैमा कोरिया जान पाइने भन्ने हुँदैन ।
उत्तीर्ण परीक्षार्थीले कोरियाका लागि रोजगार आवेदन भर्न पाउने र रोजगारदाताको छनोटमा परेमा मात्र कोरिया जाने निश्चित हुने इपीएस कोरिया शाखाले जनाएको छ ।
यसअघि भाषा परीक्षा पास भएमा रोजगार आवेदन भर्न पाइन्थ्यो । तर यो वर्षदेखि भने कोरियाले सीप परीक्षण पनि गर्न थालेको हो ।
प्रकाशित मिति: शुक्रबार, पुस ४, २०७६
