उदयपुर । उदयपुरको गोठडाँडामा बोलेरो दुर्घटना हुँदा ३ जनाको मृत्यु भएको छ । उदयपुरगढी गाउँपालिका-३ को गोठडाँडामा बिहान सवा ९ बजे बोलेरो दुर्घटना हुँदा ३ जनाको घटनास्थलमै मृत्यु भएको हो ।
जिल्ला प्रहरी कार्यालयका अनुसार, उदयपुरगढीबाट कटारी जाँदै गरेको भारतीय नम्बर प्लेटको एस के ०१ पीबी ३०६८ नम्बरको बाेलेराे दुर्घटना भएको हो। दुर्घटनामा परी उदयपुरगढी–३ का ६० वर्षीय टिकनारायण श्रेष्ठ, ५० वर्षीय ढकबहादुर इस्माली मगर र ३६ वर्षीय मिननारायण श्रेष्ठको मृत्यु भएको हाे ।
यसैगरी, दुर्घटनामा ५ जना घाइते भएका छन् । गम्भीर घाइते भएका ३ जनालाई उपचारका लागि जिल्ला बाहिर रेफर गरिएको छ भने २ जनाको कटारी अस्पतालमा उपचार भइरहेको जिल्ला प्रहरी कार्यालयका एसपी बीरबहादुर बुढामगरले बताए ।
भारतको सिक्किममा रहेका आफन्त भेटघाट गरेर घर फर्कने क्रममा बाेलेराे दुर्घटना भएको हो ।
प्रकाशित मिति: बिहीबार, पुस ३, २०७६
