काठमाडौं । सरकारले राष्ट्रियसभाको निर्वाचन आगामी माघ ९ गते गर्ने निर्णय गरेको छ । बिहीबार आयोजित पत्रकार सम्मेलनमा सरकारका प्रवक्ता एवं सञ्चार तथा सूचना प्रविधिमन्त्री गोकुल बाँस्कुटाले माघ ९ गते निर्वाचन गर्ने निर्णय गरिएको जानकारी दिएका हुन् ।
५९ सदस्यीय राष्ट्रियसभाको रिक्त १८ पदका लागि निर्वाचन हुन लागेको हो । जसमा सत्तारुढ दल नेकपाका ८, प्रमुख प्रतिपक्ष दल नेपाली कांग्रेसका ७ र राजपाका २, समाजवादीका एक र सरकारबाट मनोनीत एक गरी १९ सांसदको दुईवर्षे कार्यकाल फागुन २१ मा सकिँदैछ ।
सदस्य पद रिक्त हुनुभन्दा ३५ दिनअघि निर्वाचन गराइसक्नुपर्ने संवैधानिक व्यवस्था छ । राष्ट्रियसभाका १ तिहाई सदस्यको पदावधि प्रत्येक २ वर्षमा समाप्त हुने संवैधानिक व्यवस्था छ ।
सोअनुसार सरिता प्रसाई, सुरेन्द्रराज पाण्डे, हरिचरण सिवाकोटी, रामप्रित पासवान, विन्दादेवी आले, वृषेशचन्द्रलाल, बद्रीप्रसाद पाण्डे, बलरामप्रसाद बाँस्कोटा, मीना बुढा, मुक्ताकुमारी यादव, डा. युवराज खतिवडा, युटोल तामाङ, रमेशप्रसाद यादव, राजकुमार यादव, दुर्गाप्रसाद उपाध्याय, धनकुमारी खतिवडा, कमलाकुमारी ओली, कालीबहादुर मल्ल र खेमराज नेपालीको पदावधि फागुन २० गते सकिँदै छ ।
प्रकाशित मिति: बिहीबार, मंसिर २६, २०७६
