नयाँदिल्ली । निर्भया हत्याकाण्डपछि फेरि सिंगो भारत एकपटक आन्दोलित बनिरहको छ । सडकदेखि संसदसम्म प्रियंका रेड्डी हत्याका आरोपीलाई कारबाही गर्नुपर्ने मागसहित भारत आन्दोलित भइरहेको हो । केही दिनपहिले दक्षिण भारतको हैदरावाद सहरमा २६ वर्षीया पशु चिकित्सक प्रियंका रेड्डीको सामूहिक बलात्कारपछि हत्या गरिएको थियो । हत्यारालाई हदैसम्मको सजाय दिलाउनुपर्ने मागसहित सडकदेखि संसदसम्म हंगामा भइरहेको छ ।
हैदरावादमा भएको दर्दनाक घटनाले संसारको ध्यान एकपटक फेरि भारततर्फ तानेको छ । हत्यारालाई हदैसम्मको कारबाही गर्नुपर्ने भन्दै सांसदहरुले समेत जोडदार माग गरेका छन् । सोमबार माथिल्लो सदन राज्यसभामा बोल्दै समाजवादी पार्टीकी सांसद तथा अभिनेत्री जया बच्चनले सम्भव भए बलात्कारीलाई जनताको जिम्मा लाउनुपर्ने धारणा राखेकी छिन् । आफूले धेरै देशमा यस्तो गम्भीर अपराध गर्नेहरुलाई भीडको जिम्मा लगाइएको देखेको बताउँदै सांसद बच्चनले भनिन्, यति जघन्य अपराधमा संलग्नहरुलाई भीडको जिम्मा लगाउनुपर्छ । जे गर्छ उनीहरुमाथि भीडले नै गर्छ । फितलो कानुनी प्रक्रियाका कारण बारम्बार बलात्कारका घटना दोहोरिने गरेको सांसद बच्चनको भनाइ थियो ।
सांसदहरुले उठाएका जिज्ञासाकाे जफावमा रक्षामन्त्री राजनाथ सिंहले सरकार कानुन बदल्न समेत तयार रहेको बताएका छन् । आफ्नो अस्पतालबाट घर फर्किंदै गर्दा बाटोमै स्कुटर बिग्रिएपछि पन्चर टालिदिने भन्दै सहयोगको लालसा देखाएर प्रियंकालाई अपराधीहरुको एक समूहले आफ्नो कब्जामा लिएको थियो । कब्जामा लिएलगत्तै उनीमाथि सामूहिक बलात्कार गरी उनको हत्या गरियो र उनको लासमाथि पेट्रोल खन्याएर जलाइयो ।
स्कुटर पन्चर भएलगत्तै प्रियंकाले आफ्नी बहिनीलाई सम्पर्क गरी आफ्नो अवस्थाको बारेमा जानकारी गराएकी थिइन । बहिनीले स्कुटर छोडेर घर आउन आग्रह गरे पनि उनले आफू अर्को दिन बिहानै अस्पताल जानुपर्ने भएका कारण स्कुटर छोड्न नसकने बताइन् । सहयोगका लागि आएको मान्छेसँग आफू डराइरहेकाले फोन नकाटी कुरा गरिराख्न आग्रह गरेकी प्रियंकाको केही मिनेटमै फोन अफ भएको थियो ।
उनको परिवारले प्रहरीले खोजतालासमा लापरबाही गरेको आरोप लगाइरहेको छ । सम्पर्क विच्छेद भएलगत्तै खोजतालास गरेको परिवारले बिहान प्रहरीको सहयोगमा उनको जलेको लास फेला पारेको थियो । घटनामा संलग्न भएको आशंकामा ३ जनालाई हैदरावाद प्रहरीले पक्राउ गरिसकेको छ ।
प्रकाशित मिति: मंगलबार, मंसिर १७, २०७६
-1732776560.jpg)
