काठमाडाैं । चोरीको गाडीसहित प्रहरीले कलंकीबाट २ जनालाई पक्राउ गरेको छ ।
भारतबाट चोरी गरेर ल्याइएको गाडीसहित काठमाडौँ तारकेश्वर नगरपालिकास्थित गोलढुङ्गा बस्ने गोरखाका मुकुन्दप्रसाद पुडासैनी र सुर्खेतका दीपक बुढा पक्राउ परेको महानगरीय प्रहरी वृत्त कालिमाटीका प्रहरी नायब उपरीक्षक रुगम कुँवरले जानकारी दिए ।
उनीहरुबाट बा २१ च ८७१४ र बा १८ च ३१३८ नम्बरका स्कर्पियो तथा बा ११ च ९७९४ नम्बरको कार बरामद गरिएको छ । उनीहरुले काठमाडौँ नयाँबजारस्थित आदित्य ट्रान्सपोर्ट सञ्चालन गर्दै आएको अनुसन्धानमा खुलेको छ ।
उक्त ट्रान्सपोर्टले चोरीको गाडी प्रयोग गर्ने गरेको भन्ने सूचनाको आधारमा कालिमाटीबाट खटिएको टोलीले गएराति गाडीसहित उनीहरूलाई पक्राउ गरेको हो ।
घटनाको विषयमा थप अनुसन्धान भइरहेको प्रहरीले जनाएको छ । उनीहरुलाई थप कारबाहीका लागि राजस्व अनुसन्धान विभाग ललितपुर पठाइने प्रहरीले जनाएको छ ।
प्रकाशित मिति: शुक्रबार, कात्तिक २९, २०७६
