काठमाडौं । संसद् सचिवालयकी कर्मचारी रोशनी शाहीमाथि यौन दुर्व्यवहार गरेको अभियोगमा पक्राउ परेका कृष्णबहादुर महराको अदालतमा बयान सकिएकाे छ ।
जिल्ला अदालत काठमाडौंका मुख्य न्यायाधीश सुदर्शनराज पाण्डको इजलाशमा महराको बयान भएको हो । उनले बन्द इजलाशमा बयान दिएका हुन् ।
जवर्जस्ती करणी उद्योगको अभियोग लागेका लागेका निवर्तमान सभामुख तथा सांसद कृष्णबहादुर महराको बयानमा बिहीबार र शुक्रबार २ दिन समय लागेकाे हाे । शुक्रबार बिहान १२ बजे सुरु बयान करिब ५ घण्टामा सकिएकाे थियाे । बयान लामो भएकाले थुनछेक बहस हुन पाएन ।
अब आइतबार मात्रै थुनछेक बहस हुने अदालतले जनाएकाे छ । बिहीबार महराकाे बयान नसकिएपछि उनलाई न्यायिक हिरासतमा राख्न अदालतले आदेश दिएको थियो ।
अदालतले थुनछेक बहस सकिएपछि पुर्पक्षका लागि थुनामा पठाउने, धरौटीमा वा सामान्य तारेखमा रिहा गर्ने आदेश हुने छ । मुलुकी अपराध संहिताको दफा २१९ (३) अनुसार १८ वर्षभन्दा बढी उमेरकी महिलासँगको करणीमा न्यूनतम सातदेखि अधिकतम १० वर्षसम्म कैदको व्यवस्था छ । महराको हकमा करणी उद्योगमा मुद्दा दर्ता गरिएकाले उक्त सजायको आधामात्र मागदाबी छ । तर सार्वजनिक पद धारण गरेको व्यक्तिले कसुर गरेकाले अभियोगपत्रमा थप डेढी सजाय माग गरिएको छ ।
प्रकाशित मिति: शुक्रबार, कात्तिक १५, २०७६
-1732776560.jpg)
