रौतहट । जिउँदै मान्छेलाई इँटाभट्टामा हालेर मारेकाे अभियाेगमा प्रहरी हिरासतमा रहेका निलम्बित सांसद मोहम्मद अफताब आलमको विषयमा अनुसन्धान सकेर प्रहरीले रायसिहतकाे प्रतवेदन सरकारी वकिलकाे कार्यालयलाई बुझाएकाे छ ।
आलमकै संलग्नतामा रौतहट बम विस्फाेटका घाइतेलाई इटाभट्टामा जलाएको प्रहरीको निष्कर्ष छ । १२ वर्षअघि रौतहटको राजपुरमा भएको बम विस्फोटका मृतक र घाइतेलाई इट्टाभट्टामा जलाएको प्रहरीले तयार पारेको प्रतिवेदनले ठहर गरेको हो ।
तत्कालीन प्रहरी अधिकारी, प्रत्यक्षदर्शी तथा पीडित परिवारको बयानका आधारमा प्रतिवेदन तयार पारिएको प्रहरीले जनाएको छ । प्रतिवेदन सरकारी वकिलको कार्यालयमा बुझाएको जिल्ला प्रहरी कार्यालय रौतहटका डिएसपी नवीन कार्कीले जानकारी दिए ।
अनुसन्धानमा आलम र फरार रहेका अरु ३ जनालाई घटनाको मुख्य दोषी किटान गरिएको छ । प्रतिवेदनमा मृतकको संख्या भने किटान गरिएकाे छैन । आलमविरुद्ध बम विस्फाेट, ज्यान मार्ने उद्योग र कर्तव्य ज्यान गरी तीन मुद्दा लगाउन प्रहरीले राय दिएको छ ।
प्रहरीले २ समयका कानुनअनुसार आलममाथि सजाय माग गर्न राय दिएकाे छ । उनलाई घटना भएका बेला लागू हुने कानुनअनुसार सर्वस्वसहित जन्मकैद हुनुपर्ने राय प्रहरीकाे छ। त्यस्तै गत वर्ष भदौ १ देखि लागू भएको मुलुकी अपराध संहिताअनुसार यातना दिएर मारेकोमा आलमलाई आजन्म कैद हुनुपर्ने माग पनि प्रतिवेदनमा गरिएको छ ।
‘कुन कानुनअनुसार कारबाही गर्ने अदालतको कुरा हो। हामीले दुवै कानुनअनुसार हदैसम्मको सजाय माग गरेका छौं,’ डिएसपी कार्कीले भने । जन्मकैद सजाय पाए आलम २० वर्ष जेल बस्नुपर्ने छ भने आजन्म कैद भए उनी बाँचुञ्जेल जेलमा बस्नुपर्ने छ ।
प्रहरी प्रतिवेदनमा भएका तथ्य र प्रमाण हेरेर सरकारी वकिल कार्यालयले मुद्दा चलाउने/नचलाउने निर्णय गर्ने छ । प्रमुख सरकारी वकिल कटुवालले सोमबारसम्म मुद्दा चलाउने/नचलाउने निर्णय गरिने जानकारी दिए ।
प्रकाशित मिति: शुक्रबार, कात्तिक १५, २०७६
-1732776560.jpg)
