काठमाडौं: नेपाल प्रहरीले तिहारमा देशकाे ४३ स्थानबाट चार सय ६५ जना जुवाडेलाई पक्राउ गरेको छ । विभिन्न जिल्ला प्रहरी कार्यालय र इलाका प्रहरी कार्यालयले चलाएको अपरेसनमा ३ करोड ३० लाख रुपैयाँ पनि बरामद भएको प्रहरी प्रधान कार्यालयका प्रवक्ता विश्वराज पोखरेलले बताए ।
गत कात्तिक २ गतेदेखि १३ कात्तिक सम्मकाे अपरेशनबाट पक्राउ गरिएकाे प्रवक्ता पोखरेलले बताए, पक्राउ परेकामध्ये अधिकांशविरुद्ध जुवा ऐन अन्तरगत मुद्दा चलाइएको छ भने केही धरौटीमा छुटिसकेका छन् ।
उनका अनुसार तिहारमा चलाइएको अपरेशनमध्ये सबैभन्दा ठूलो महाराजगञ्जमा चलाइएको अपरेशन हो । जसमा २ करोड ६७ लाख रुपैयाँ बरामद भएको छ भने २५ जना भीआईपी जुवाडे समातिएका छन् ।
समातिनेमा क्यासिनो किङका रुपमा चिनिने गुण्डा बलराम सापकोटा उर्फ बले, ठेकदार पवनकुमार गुप्ता, उद्योगी श्रवणकुमार गोयल, एयर डाइनेस्ट्रीका सञ्चालक पवित्रकुमार कार्की, जुवा खेलाउने विक्रम गौतम, मुक्ति लामा, इन्द्रबहादुर श्रेष्ठ, शम्भुबहादुर बुढाथोकीलगायत छन् ।
महाराजगञ्जमा शनिबार राति चलाइएको जुवा अपरेसनमा पक्राउ परेका जुवाडेलाई नछाड्न अदालतले आज नै आदेश दिएको हो । सर्वोच्च अदालतका न्यायाधीश पुरुषोत्तम भण्डारीको इजलासले बुधबार उनीहरुलाई ‘साथमै राख्न’ आदेश दिएको हो ।
प्रकाशित मिति: बुधबार, कात्तिक १३, २०७६
-1732776560.jpg)
