राजविराज । तिहारमा घर लिपपोत गर्नको लागि माटो खन्ने क्रममा सप्तरीको कञ्चनरुप–११ गोरपारमा ढिस्कोले पुरिएर १ बालिकाको आज दिउँसो मृत्यु भएको छ ।
मृत्यु हुनेमा जिल्लाको कञ्चनरुप–११ गोरपार निवासी पवन सरदारकी १३ वर्षीया छोरी पुष्पाकुमारी सरदारको रहेको इलाका प्रहरी कार्यालय कञ्चनपुरका प्रहरी नायब उपरीक्षक मकेन्द्रकुमार मिश्रले जानकारी दिए । उनको ढिस्कोले पुरिएर घटनास्थलमै मृत्यु भएको प्रहरीले जनाएको छ ।
३ बालिका दीपावलीका लागि घर लिपपोत गर्ने भन्दै कञ्चनरुप नगरपालिका–११ स्थित गोरपारमा कमेरो माटो खन्ने क्रममा ढिस्कोले पुरिँदा बालिका पुष्पा कुमारीको मृत्यु भएको हाे भने अर्का २ बालिका घाइते भएका छन् ।
सोही ठाउँका लागू सरदारकी १५ वर्षीया छोरी मन्त्रिता सरदारको देब्रे खुट्टा पूरै चुँडिएर घाइते छन् । त्यस्तै मनिलाल सरदारकी १७ वर्षीया छोरी सुस्मिता सरदारको समेत हात र खुट्टामा चोट लागेको प्रहरी उपरीक्षक मिश्रले बताए ।
घाइते मन्त्रिताको उपचारका लागि नोबेल हस्पिटल विराटनगर पठाइएको इलाका प्रहरी कार्यालय कञ्चनपुरले जनाएको छ । यस्तै सुस्मिता सरदारको कृति सामुदायिक स्वास्थ्योपचार केन्द्र रुपनगरमा उपचार भइरहेको र उनको अवस्था सामान्य रहेको अस्पतालले जनाएको छ ।
प्रकाशित मिति: शुक्रबार, कात्तिक ८, २०७६
