ब्राजिलको बेलो हरिजोन्ट सहरमा एउटा सानो विमान दुर्घटना हुँदा कम्तीमा ३ जनाको मृत्यु भएको छ । सोमबार भएको यस दुर्घटनामा परी अन्य ३ व्यक्ति घाइते भएका स्थानीय प्रहरीले जनाएको छ ।
इन्जिनमा समस्या आएपछि राजधानी मिनास गेराइज राज्यको आवासीय इलाकाको सडकमा सो विमान खसेको थियो । विमानले सडकमा गुडिरहेका तीनवटा कारलाई ठक्कर दिएको र त्यसलगत्तै विमानमा आगलागी भएको प्रत्यक्षदर्शीले बताएका छन् ।
प्रत्यक्षदर्शीहरुका अनुसार यस विमान विस्फोटमा परी ४ ओटा गाडी पूर्णरुपले क्षतिग्रस्त भएका छन् । विमानमा १ चालक र ३ यात्रु सवार थिए ।
विमानका १ व्यक्ति, कारका १ र १ पैदल यात्रीको मृत्यु भएको प्रहरीले जनाएको छ । विमानका ३ र १ कार यात्री घाइते भएका छन् । घाइतेहरुको अवस्था चिन्ताजनक रहेको अस्पतालको भनाइ उद्धृत गर्दै स्थानीय अधिकारीहरुले बताएका छन् ।
इल्हेअस सहरका लागि उडेको केही समयभित्रै विमान दुर्घटना भएको थियो । यसै वर्ष ब्राजिलको यही क्षेत्रको सडकमा २ वटा विमान दुर्घटना भइसकेका छन् ।
प्रकाशित मिति: मंगलबार, कात्तिक ५, २०७६
