काठमाडौं । गजलगो सुविद गुरागाईले आफ्नो गजलहरु संगृहीत सांगीतिक एल्बम बजारमा ल्याएका छन् ।
शनिबार काठमाडौं दरबारमार्गस्थित मधुशालामा ९८ वर्षीया माता इन्द्रमाया पौडेल र अग्रज गजलकार बूँद राना, गीतकार तथा कवि दिनेश अधिकारी, गजलकार रवि प्राञ्जल, राष्ट्रियसभा सदस्य विमला पौडेललगायतले गुरागाईंको एल्बम ‘नलाएको माया’ सार्वजनिक गरे ।
माता परिवारले निर्माण गरेको एल्बम सार्वजनिक गर्ने क्रममा वरिष्ठ गायक उदय सोताङ, गायक–गायिकाहरू सञ्जीव धिमाल, निरा रानाभाट, बबिना भट्टराई, अस्मिता अधिकारी, श्रेय अगस्तीले प्रत्यक्ष गजल गाएका थिए ।
साथै सोही एल्बममा समावेश मुख्य गलज ‘नलाएको माया’को म्युजिक भिडियो पनि सार्वजनिक गरियो । उक्त गजलमा गायक सत्यराज आचार्यले स्वर दिएका छन् भने निकेश खड्का निर्देशित भिडियोमा गायक आचार्य, लक्ष्मी बर्देवा र जोर्डन राजभण्डारीको सशक्त अभिनय छ ।
विपिन किरणले सञ्चालन गरेको लोकार्पण कार्यक्रममा गजलकारहरु डा. घनश्याम न्यौपाने परिश्रमी, धीरेन्द्र प्रेमर्षि, सुरेश सुवेदीलगायतले गजलबारे धारणा राखेका थिए ।
हेर्नुहाेस् भिडियाे ः
प्रकाशित मिति: आइतबार, असोज ५, २०७६
