काठमान्डौ : यतिबेला नेपाली चलचित्र हलमा दक्षिण भारतीय सुपरस्टार प्रभास अभिनीत चलचित्र साहो चलिरहेको छ । समीक्षकहरुबाट खासै राम्रो प्रतिक्रया नपाएको यो चलचित्रले तीन दिनको विकेन्डमा झन्डै ८० करोड भारु कमाइ गरेको छ ।
यो चलचित्रले रिलिज भएको पाँच दिनमा मात्र करोड क्लबमा प्रवेश गरेको थियो । यो चलचित्र चल्नुमा प्रभासको ब्रान्ड भ्यालुले निकै मदत पुगेको छ । यो चलचित्रमा दक्षिण भारतका सुपरस्टार प्रभास र बलिउड नायिका श्रद्धा कपुरको मुख्य भूमिका छ ।
समीक्षकबाट राम्रो प्रतिक्रिया नपाए पनि प्रभासको ब्रान्ड भ्यालुका कारण राम्रो कमाइ गरिरहेको यस चलचित्रलाई यतिबेला अर्को झट्का लागेको छ । हलिउड फिल्मका जेरोमले आफ्ने ट्विटमार्फत यो चलचित्र आफूले निर्देशन गरेको चलचित्र लार्गो विन्च को कपी भएको बताएका छन् ।
उनले व्यंग्यात्मक शैलीमा भनेका छन्, मेरो करियर शायद भारतमा पो राम्रो होला जस्तो छ । उनले आफू अरुका लागि सहयोगी बनिदिन तयार भएको बताएका छन् । योभन्दा पहिले तेलुगु चलचित्र निर्देशक त्रिविक्रम श्रीनिवासलाई पनि उनले आफ्नो फिल्म चोरेको आरोप लगाएका थिए ।
उनले अर्कोे ट्विटमा आक्रोशित हुँदै भनेका छन्, यसरी फोकटमा रिमेक गरिएको यो दोस्रो फिल्म हो । तर यो फिल्म पनि पहिलेको जस्तै नराम्रो बनाइएको रहेछ । त्यसैले कृपया तेलुगु निर्देशक ज्यूहरु ! यदि तपाइहरु मेरो फिल्मको रिमेक बनाउन चाहनुहुन्छ भने अलि राम्रो बनाउनुहोला ।
प्रकाशित मिति: बुधबार, भदौ १८, २०७६
