कञ्चनपुर : कञ्चनपुरका किसानलाई धानखेतीका लागि रासायनिक मल युरिया मलको अभाव भएको छ । अनुदानको मल नपाएपछि किसानले भारतबाट अवैधरूपमा भित्र्याइएको रासायिनक मल युरियाको प्रयोग गर्नुपरेको छ ।
व्यापारीले तोकेको चर्को मूल्यमा किसानले युरिया खरिद गर्दै आएका छन् । भारतबाट भित्र्याइएको मलसमेत थोरै मात्र किसानले पाएका छन् । भारतबाट खरिद गरेर मल ल्याउँदा सीमा क्षेत्रमा भारतीय सुरक्षाकर्मीले ल्याउन दिँदैनन् , स्थानीय किसान बाधुराम चौधरीले भने, बजारमा युरिया मल छैन । पाइएको मल खरिद गरिनसक्नु मूल्यको छ ।
धान रोपेको २० दिनभित्र युरिया छरिसक्नु पर्दछ , अर्का किसान बैदार चौधरीले भने, धान रोपेको महिना दिन बित्नै लागेको छ । अहिलेसम्म मल पाइएको छैन । भारतबाट भित्र्याइएको युरिया ४५ किलोको बोराको किसानले दुई हजार ३० रुपैयाँ तिर्नुपरेको छ । मल बिक्रेताले मनोमानीरुपमा मूल्य कायम गरी मल अभाव भएको फाइदा उठाउँदै चर्को मूल्यमा युरिया मल बिक्री गर्दै आएको किसानको गुनासो छ ।
अनुदानको रासानिक मलको बिक्री दररेट प्रतिक्विन्टल एक हजार छ सय ६२ रुपैयाँ छ । अनुदानको मल बिक्रीको जिम्मा पाएको कृषि सामग्री कम्पनीको शाखा भीमदत्तनगरले मागअनुरूपको मल आपूर्ति गर्न नसक्दा किसानले हैरानी खेप्नुपरेको हो ।
कृषि सामग्री कम्पनीले यस वर्ष ८१ मेट्रिकटन मात्रै रासानिक मल आपूर्ति गरेको थियो । सो मल असार महिनामै सकिएको छ । कम्पनीको दुई हजार पाँच सय मेट्रिक टन युरिया खरिद गर्ने लक्ष्य भए पनि थोरै मात्रै आपूर्ति हुँदा अभाव भएको कम्पनीका निमित्त कार्यालय प्रमुख बलबहादुर शाहले बताए ।
युरिया समयमै खरिद गर्न नसक्दा र ढुवानीको समस्याले आपूर्ति हुननकेको उनको भनाइ छ । तत्काल युरिया आउने सम्भावना छैन , उनले भने, भर्खरै भारतको कोलकाता बन्दरगाहमा पुगेको भन्ने खबर छ । त्यहाँबाट यहाँसम्म आइपुग्न अझै एक महिना लाग्छ ।
प्रकाशित मिति: मंगलबार, साउन २१, २०७६
-1732776560.jpg)
