जननेता स्व मदन भण्डारीको ६८औँ जन्मजयन्ती मनाइएको छ । मदन भण्डारी फाउण्डेसनले जन्मजयन्तीका अवसरमा आयोजना गरेको विचार गोष्ठिमा पूर्व परराष्ट्रमन्त्री महेन्द्र पाण्डेले नेपाली कम्युनिष्ट आन्दोलनमा जननेता मदन भण्डारीको योगदानको चर्चा गरे । उनले भण्डारीकै कारण कम्युनिष्ट पार्टी आज सत्तामा पुग्न सकेको जिकिर गर्दै यतिबेला भण्डारीका विचार अनुसार कम्युनिष्ट पार्टी अगाडि बढ्न नसकेको बताए ।
उनले यतिबेला पार्टिभित्र आन्तरिक समस्या देखिएकाले त्यसको समाधान गर्न नसके कम्युनिष्ट पार्टी कमजोर हुने भनाइ राखे । कार्यक्रममा प्रदेश नं–३ का सांसद शशिजङ्ग थापा, प्रतिभा श्रेष्ठ र सरस्वती वाटी, नेकपाका केन्द्रीय सदस्य एवं भक्तपुर इञ्चार्ज दिलीप प्रजापति, नेकपा केन्द्रीय सदस्य भक्तपुर सह–इन्चार्ज एवं चागँुनारायण नगरपालिकाका प्रमुख सोमप्रसाद मिश्र, गरीबी निवारण कोषका उपाध्यक्ष तथा नेकपा प्रदेश कमिटी सदस्य निर्मलकुमार भट्टराईलगायतले मदन भण्डारीको सरल जीवनशैली र उनको योगदानका विषयमा चर्चा गरेका थिए । रासस
प्रकाशित मिति: शुक्रबार, साउन १७, २०७६
