काठमाडौं : धनगढीको निलम होटेलमा भएको बम विस्फोटमा परि घाइते १ जनाको मृत्यु भएको छ । मृत्यु हुनेमा बझाङ घर भएका राम सिंह रहेका छन् । उनको हिजो राति ११ बजेतिर उपचारका क्रममा धनगढीको माया मेट्रो अस्पतालमा मृत्यु भएको हो ।
धनगढी उप–महानगरपालिका वडा नम्बर ४ को सहिद गेट नजिकै रहेको निलम होटेलमा बिहीबार साँझ पौने ७ बजेतिर विस्फोट भएको थियो । सुरुमा सिलिन्डर विफोट भनिए पनि घटनाको अनुसन्धानका क्रममा बमनै विस्फोट भएको प्रहरीले जनाएको छ । जिल्ला प्रहरी कार्यालय कैलालीका प्रहरी नायव उपरीक्षक दक्ष कुमार बस्नेतका अनुसार घटनास्थलबाट एउटा मोटरसाइकल र एउटा पेस्तोल बरामद भएको छ । घटनामा राम सिंहले बोकेको बम विस्फोट भएको हुनसक्ने प्रारम्भिक अनुसन्धानबाट खुलेको उनले बताए ।
अन्य घाइते होटेल सञ्चालक केशवराज पाण्डे, जितेन्द्र यादव, मोविन खान र लक्ष्मण सेरलाको अहिले पनि माया मेट्रो अस्पतालमै उपचार भइरहेको छ । घाइते सेरला र मृतक राम सिंहका परिवारलाई बुझ्दा उनीहरू काठमाडौँ तर्फ जान एउटै मोटरसाइकलमा आएको र होटेलमा बसेको समयमा टिफिनमा राखिएको बम पड्किएको बस्नेतको भनाइ छ ।
प्रकाशित मिति: शुक्रबार, साउन ३, २०७६
