एक दिवसिय विश्वकप क्रिकेटमा भारतले श्रीलंकालाई ७ विकेटले पराजित गरेको छ ।
यस जितसँगै भारत ९ खेलमा ७ मा जित र १ मा हारका साथ १५ अंक जोड्दै शीर्ष स्थानमा उक्लिएको छ । दोस्रो स्थानमा पुगेको अष्ट्रेलिया दक्षिण अफ्रिकासँगको जारी खेलमा पराजित भएमात्रै भारत शीर्ष स्थानमा रहने छ । अष्ट्रेलिया विजयी भए भारत पुन दोस्रो स्थानमा झर्ने छ ।
२ सय ६५ रनको लक्ष्य भारतले ४३.३ ओभरमा ३ विकेटको क्षतिमा पुरा गर्यो । भारतका लागि ओपनर रोहित शर्माले कीर्तिमानी शतक प्रहार गरे । रोहित ९४ बलमा १४ चौका र २ छक्का सहित १ सय ३ रनमा क्याच आउट भए ।
त्यस्तै अर्का ओपनर के एल राहुलले पनि १ सय ११ रनको उत्कृष्ट शतक प्रहार गरे । त्यस्तै कप्तान विराट कोहलीले ४१ बलमा ३ चौका सहित ३४ रनमा अविजित रहे । ऋषभ पन्त ४ रहार्दिक पान्ड्या ७ रनको योगदान दिए । श्रीलंकाका लागि लाथिस मलिंगा,इसुरु उडना र कसुन राजिथाको नाममा समान १ विकेट रह्यो ।
त्यसअघि लिड्समा टस जितेर पहिला ब्याटिङ गर्ने निर्णय लिएको श्रीलंकाले निर्धारित ५० ओभरमा ७ विकेटको क्षतिमा २ सय ६४ रन बनायो । श्रीलंकालाई अनुभबी ब्याट्सम्यान एन्जिलो म्याथ्युजले १ सय १३ रनको शतकीय पारी खेले । ४९ ओभरको दोस्रो बलमा जसप्रित बुमराहले रोहित शर्माबाट क्याच आउट गराउनु अघि म्याथ्युजले १ सय २८ बलमा १० चौका र २ छक्का प्रहार गरे । धनन्जय डी शिल्भा २९ रनमा अविजित रहे ।
एक समय ११.४ ओभरमा ५५-४ को कमजोर अवस्थामा पुगेको श्रीलंकालाई पाँचौ विकेटका लागि एन्जिलो म्याथ्युजले लाहिरु थारिमनेसँग १ सय २४ रनको शतकीय साझेदारी गर्दै इनिङ उकासे । कुलदीप यादवको ३८ ओभरको पाँचौ बलमा ठूलो सर्ट खेल्ने धुनमा रविन्द्र जडेजाबाट क्याच आउट हुनुअघि लाहिरुले ६८ बलमा ४ चौका सहित ५३ रनको महत्वपूर्ण योगदान दिए ।
श्रीलंकाले चौथो ओभरको चौथो बलमा कप्तान दिमुथ करुणारत्नेलाई १० रनमा गुमाएको थियो । उनलाई जसप्रित बुमराहले महेन्द्रसिंह धोनीबाट क्याच आउट गराए । बुमराहलेनै कुशल परेरालाई १८ रनमा क्याच आउट गराए ।
परेराले १४ बलमा ३ चौका प्रहार गरे । ११ ओभरको चौथो बलमा रविन्द्र जडेजाले बल बिट गराउँदै कुशल मेन्डिसलाई महेन्द्रसिंह धोनीबाट ३ रनमा स्टम्पिङ आउट गराए । अभिष्का फर्नान्डोलाई हार्दिक पान्ड्याले २० रनमा क्याच आउट गराएपछि श्रीलंका कमजोर अवस्थामा पुगेको थियो । भारतका लागि जसप्रित बुमराहले १० ओभरमा २ मेडन सहित ३७ रन खर्चेर ३ विकेट हात पारे । भुवनेश्वर कुमार,हार्दिक पान्ड्या,रविन्द्र जडेजा र कुलदीप यादवले समान १ विकेट हात पारे ।
प्रकाशित मिति: आइतबार, असार २२, २०७६
