काठमाडौं : प्रहरीले गैंडाको खागसहित एक जनालाई पक्राउ गरेको छ । पक्राउ पर्नेमा गोरखाको चुमनुब्री-३, सिर्दिवासका ५३ वर्षीय लालबहादुर गुरुङ छन् ।
महानगरीय प्रहरी परिसर, टेकुका डीएसपी होविन्द्र बोगटीका अनुसार गुरुङसँगै सेतो सिसाको पत्थरसहित धादिङका ३३ वर्षीय अष्टबहादुर थिङ र ३४ वर्षीय गोविन्दप्रसाद मोक्तान पनि पक्राउ परेका छन् ।
उनले भने, ‘महानगरीय प्रहरी वृत्त, लैनचौरका डीएसपी सन्तोषसिंह राठौरसहितको टोलीले लालबहादुरको कोठामा छापा हानेर ३ जनालाई बुधबार दिउँसो पक्राउ गरेको हो ।’
बोगटीका अनुसार उनीहरुले ५५ लाख रुपैयाँमा गैंडाको खाग विक्री गर्न लागेका थिए । पक्राउ परेकालाई थप अनुसन्धान तथा कारबाहीको लागि जिल्ला वन कार्यालय, हात्तिसार पठाइएको छ ।
प्रकाशित मिति: बिहीबार, असार १२, २०७६
