धुलिखेल नगरपालिका–४ अरनिको राजमार्गसँगै रहेको काठमाडौं विश्वविद्यालय मार्ग सडकको ३ आना जग्गा बिक्री प्रकरणमा मालपोत कार्यालय काभ्रे र धुलिखेल नगरपालिकाका कर्मचारीको संलग्नता देखिएको छ।
२०६२ साल भदौ ९ गते साविक कित्ता नम्बर ६३३ को १० आना ३ दाम क्षेत्रफलबाट मैया सार्कीले कित्ताकाट गरी ६५१ कित्ताको ७ आना ३ दाम जग्गा रवीन्द्र श्रेष्ठ यगोल धुलिखेललाई ६० हजार रुपैयाँमा बिक्री गरेकी थिइन्।
धुलिखेल नगरपालिकाका इन्जिनियर जैसिलाल मण्डलले उक्त जग्गामा घर बाटो केही नभएको भन्दै सिफारिस गरिदिएका थिए। २०४८ सालमा खुलेको काठमाडौं विश्वविद्यालय जाने सडक त्यही बेलादेखि सञ्चालनमा छ। इन्जिनियर मण्डलले किन सडक भएको जमिनलाई छैन भनेर सिफारिस गरे? त्यो रहस्यमय विषय बनेको छ।
६३३ कित्ताकै बाँकी ३ आना जग्गा ६५२ कित्तामा कायम भई मैया सार्कीकै नाममा बाँकी थियो। २०७१ असार १२ गते मैया सार्कीले २ लाख ५० हजार रुपैयाँमा ज्ञानबहादुर मोक्तान र लोकेन्द्र तोलांगेलाई उक्त जग्गा बिक्री गरेकी थिइन्, जतिबेला धुलिखेल नगरपालिकाका कार्यकारी अधिकृत हरिराम नागिलाले २०७१ असार ११ गते कित्ता नम्बर ६५२ मा घर नभएको तर पक्की सडकसँग जोडिएको भन्ने बेहोराको घरबाटो प्रमाणित गरिदिएका थिए ।
त्यतिबेला पनि ६५२ नम्बर कित्ताको ३ आना जग्गा मूल सडकमा थियो। कार्यकारी अधिकृत नागिलाकोे पनि उक्त सिफारिसमा कैफियत देखिएको छ।
त्यतिबेला मालपोत कार्यालय काभ्रेमा फाँटवाला मालपोत अधिकृत सुबोध खनाल थिए भने नासु कटकबहादुर खड्का र रेवती तिमल्सिनाका जग्गा पासको काम गरका थिए ।
मैया सार्कीले बेचेको उक्त जग्गा पुनः २०७३ साल बैशाख ७ गते लोकन्द्र विष्टले ज्ञानबहादुर मोक्तानको जिल्ला अदालतबाट अधिकृत वारेसनामा लिई एक्लै मिना भैललाई ६ लाख ५० हजार रूपैयामा विक्री गरेकी थिइन् । त्यतिबेला पनि मालपोत अधिकृत सुबोध खनाल नै थिए भने नासु कटकबहादुर खड्का र रेवती तिमल्सिना त्यही फाँटमा कार्यरत थिए।
२०७१ असार ११ गते प्रमाणित गरिएको घर बाटो सिफारिसकै आधारमा दोस्रो पटक जग्गा किनबेच भएको देखिन्छ। घर बाटो प्रमाणित गर्दा सम्वन्धित जग्गा धनिको नाम उल्लेख हुन्छ। मालपोत कार्यालयले त्यो कुरामा चासो दिएको देखिदैन। कर्मचारीको मिलेमतो रहेकाले घरबाटो प्रमाणितलाई आधार बनाएको देखिँदैन।
मिना भैलले २०७५ असोज ५ गते कृष्णराम दुवाल र लक्ष्मीप्रसाद प्रजापतिलाई १२ लाख रूपैयाँमा उक्त जग्गा बिक्री गरेकी थिइन् । मालपोत कार्यालयले पुनः २०७१ असार ११ गते लिएको घरबाटो प्रमाणित सिफारिसका आधारमा जग्गा पास गरेको देखिन्छ।
स्थानीय सरकारको अनिवार्य सिफारिस आवश्यक पर्ने भए पनि मालपोत कार्यालयले पिच सडकको राजस्व बुझाएको आधारमा पुरानै सिफारिसपत्रलाई आधार मानेर पास गरिदिएको देखिन्छ। मालपोत अधिकृत भोलानाथ घिमिरे र नासु गुरूप्रसाद घिमिरेले उक्त जग्गा पास गरेकाे स्रेस्ताबाट देखिन्छ।
मालपोत कार्यालय काभ्रेका सूचना अधिकारी मालपोत अधिकृत जयन्त भट्टराईका अनुसार घर बाटो सिफारिस ३५ दिन पछि आधार मान्न नसकिने बताउँछन् ।
अनिवार्य घरबाटो सिफारिस मालपोत कार्यालयमा जग्गा पास गर्दा पछिल्लो पटक भएको जग्गा धनीका नाममा स्थानीय सरकारले बनाइएको हुन्छ। उक्त प्रकरणमा त्यस्तो भएको नदेखिएको मालपोत अधिकृत जयन्त भट्टराईले बताए ।
प्रमुख मालपोत अधिकृत ध्रुवप्रसाद कोइरालाले कानुन अनुसार दोषी देखिएका कर्मचारीहरूलाई कारवाही गर्ने बताए। सडकमा परेको जग्गाको लगत कट्टा गरिएको छैन तर पनि २०६२ सालमै ३ आना जग्गा बाटोमा परेको भन्दै कित्ताकाट गरेर छाडेको अवस्थामा मैया सार्कीले किन विक्री गरिन् ? अनुसन्धान त्यहीँबाट सुरु गर्नु पर्ने मालपोत कार्यालयका कर्मचारीहरूले बताएका छन्।
अनुसन्धानमा मालपोत र नगरपालिकाका कर्मचारीहरू सबैलाई नियन्त्रणमा लिनुपर्ने सर्वसाधारणहरूले बताएका छन्।
‘नक्कली ट्रेस नक्सा बनाई अरूको जग्गा देखाई विश्वास दिलाएर पिच सडक बिक्री गरेछन्’ उजुरीमा भनिएको छ– ‘जग्गा बिक्री गर्ने मिना भैल, धुनपा ७ बखुण्डोलका लोकेन्द्र तोलांगे र उनकी श्रीमती सोनु तोलांगे, महाभारत गापा गोकुले ४ का ज्ञानबहादुर मोक्तान विरुद्ध जिल्ला प्रहरी कार्यालय काभ्रेमा २०७६ बैशाख १५ गते जाहेरी दर्ता गरिएको थियो।
प्रहरीले एक साताअघि मात्रै मिनालाई पक्राउ गरी अनुसन्धान सुरू गरेको हो। उजुरी परेका लोकेन्द्र, उनकी श्रीमती सोनुलाई प्रहरीले सोमबार राति पक्राउ गरेको छ। -समाचारपत्रबाट
प्रकाशित मिति: शुक्रबार, जेठ २४, २०७६
