राजविराज : सप्तरीको राजविराजस्थित ग्लोबल कृषि सहकारी हाटबजारका पाँच पसलमा बिहीबार राति (बिहान) चोरी भएको छ ।
चोरले राजविराज ७ स्थित बजारमा राखिएको सिसी क्यामेरामा कालो रुमालले बाँधेर चोरी गरेको ग्लोबल बहुमुखी सहकारी संस्थाका अध्यक्ष सुखराम यादवले जानकारी दिए ।
चोरले दृष्टि चामल पसलबाट २५ हजार, गुलसन खातुनको किराना पसलबाट ५० हजार, रोशनी कस्मेटिक पसलबाट आठ हजार नगदसहित २५ हजार बराबरको सामान, राजाराम यादवको फोटोकपी पसलबाट ल्यापटपसहित ६० हजार र सम्झना भुजेलको कस्मेटिक पसलबाट १० हजार नगदसहित २५ हजारको सामान चोरेर भागेको संस्थाका अध्यक्ष यादवले बताए ।
मध्यराति हावाहुरी चलेपछि बत्ती गएको मौका छोपी आएका चोरले सिसी क्यामेरामा समेत कालो रुमालले बाँधेर चोरी गरेको दृष्टि चामल पसलकी सञ्चालिका सरिता झाले बताइन् । पीडितले संयुक्तरूपमा जिल्ला प्रहरी कार्यालय सप्तरीमा उजुरी दिएका छन् ।
प्रकाशित मिति: शुक्रबार, जेठ १०, २०७६
-1732776560.jpg)
