विराटनगर : दाइजो नदिएको भन्दै विवाहकाे मण्डपमै बेहुली छाडेर भाग्ने बेहुलालाई मोरङ प्रहरीले पक्राउ गरेको छ ।
जहदा ४ का २४ वर्षीय लक्ष्मण राजवंशी पक्राउ परेका हुन् । गत जेठ ४ गते जहदाकै २१ वर्षीय युवतीसँग विवाह भइरहेको अवस्थामा राजवंशी मागबमोजिमको दाइजो नदिएको भन्दै विवाह छाडेर हिँडेका थिए ।
उनले बेहुली पक्षलाई मोटरसाइकल, सुनको सिक्री र डाइनिङ टेबल दिनुपर्ने भन्दै दबाब दिए तर बेहुली पक्षले दिन नसक्ने भनेपछि उनी विवाहको मण्डप नै छाडेर भागेको आधारमा पक्राउ गरिएको जिल्ला प्रहरी कार्यालय मोरङका प्रवक्ता डीएसपी घनश्याम श्रेष्ठले जानकारी दिए ।
आर्थिक अवस्था न्यून भएकोले माग भए बमोजिमको सामग्री दिन नसक्ने केटी पक्षकाले बताएपछि बेहुला पक्ष बेहुलीलाई मण्डपमै छाडेर हिँडेका राजवंशीलाई बुधबार पक्राउ गरिएको हो ।
बेहुलालाई बेहुली पक्षको उजुरीको आधारमा पक्राउ गरी अनुसन्धान अघि बढाइसकेको प्रहरीले जनाएको छ ।
डीएसपी श्रेष्ठका अनुसार राजवंशीलाई मुलुकी अपराध ऐन २०७४ अन्तर्गतको विवाहसम्बन्धी कसूर बमोजिम जिल्ला अदालत मोरङबाट म्याद थप गरी थप अनुसन्धान भइरहेको छ ।
-1732776560.jpg)
