म्यानचेस्टर सिटीले एफए कपको उपाधि जितेको छ । वार्टफोर्डलाई ६–० ले हराउँदै प्रिमियर लिग च्याम्पियन सिटीले एफए कप जितेको हो ।
रहिम स्टर्लिङले ह्याट्रिक गरेको एक पक्षिय खेलमा डेभिड सिल्भा, केभिन डि ब्रुयने र गाब्रियल जेससले समान १ गोल गरे । एफए कप अघि सिटीले लिग कप र प्रिमियर लिग उपाधि जितेको थियो ।
खेलमा वार्टफोर्डले अग्रता लिने मौका गुमाएको थियो । रोबेर्टो पेरेराको वान भर्सेस वान प्रयासलाई इडरसनले रोकेको थिए । मौका चुकाएको वार्टफोर्डविरुद्ध सिटीले २६ औं मिनेटमा अग्रता लिएको थियो ।
३८ औं मिनेटमा स्टर्लिङले गोल गर्दा सिटीले पहिलो हाफमा २–० को अग्रता बनाएको थियो । ब्रुयनेले ६१ औं मिनेटमा सिटीका लागि तेस्रो गोल गरेका थिए ।
एकतर्फी खेलमा ६८ औं मिनेटमा जेससले गोल गरे । स्टर्लिङले ८१ औं र ८७ औं मिनेटमा गोल थप्दै ह्याट्रिक पुरा गरे ।
प्रकाशित मिति: आइतबार, जेठ ५, २०७६
