अफगानिस्तानको दक्षिणी प्रान्त हेलामान्डमा रातभर भएको हवाई कारबाहीमा परी १७ प्रहरी मारिनुका साथै अन्य १४ घाइते भएका स्थानीय स्रोतले जानकारी दिएको छ ।
आफ्नै सहकर्मीले गरेको कारबाहीमा परी सुरक्षा अधिकारीहरूले ज्यान गुमाएका यो पछिल्लो घटना भएको बताइएको छ । प्रान्तीय राजधानी लासकार घाको बाहिरी क्षेत्रको ताङ्की इलाकामा रहेको प्रहरीचौकीमा बिहीबार राती अज्ञात सङ्ख्यामा आएका सशस्त्र तालिबान लडाकु समूहले बन्दुक,रकेट आक्रमण गरेको स्थानीयले जानकारी दिएका छन् । आक्रमणमा परेकाको सहयोगका लागि राजमार्गका प्रहरी कमाण्डर हाजी हबिबको नेतृत्वमा सो इलाकामा पुगेका प्रहरीको समूह हवाई कारबाहीका परेका थिए । यस कारबाहीमा हबिबको समेत मृत्यु भएको बताइएको छ ।
अमेरिका र नेटोआवद्ध संयुक्त गठबन्धन सेनाको हवाई कारबाहीको क्रममा सो घटना भएको बताइएको छ । यस विषयमा कुनै औपचारिक विज्ञप्ति प्राप्त नभएको र विस्तृत विवरण पनि हाल प्राप्त भएको छैन । यसअघि पनि गत फेब्रुअरी २६ मा घाज्नी प्राप्तमा भएको हवाई आक्रमणमा सरकार समर्थक आठ नागरिक सेनाका सदस्य मारिनुको साथै अन्य चार घाइते भएको थिए ।
हेलमान्ड तालिबान लडाकु समूहको बलियो पक्कड रहेको प्रान्तको रूपमा रहेको छ । हालका दिनमा अफगानिस्तानका तालिबान लडाकु र अन्य आतङ्ककारी समूहको आक्रमणमा परी सुरक्षा अधिकारीहरूको हताहत बढेको छ ।
-1732776560.jpg)
