इरानसँग सन् २०१५ मा भएको आणविक सम्झौतालाई सुरक्षित गर्न चीन र रूसको तर्फबाट ‘ठोस पहल’ गर्न आवश्यक रहेको इरानी विदेशमन्त्री मोहम्मद जावेद जरिफले शुक्रबार बताएका छन् । उनले अमेरिका र इरानबीचको बढ्दो तनावले ‘खतरनाक’ परिस्थिति निम्त्याउन सक्ने चेतावनी उनले दिनुभयो ।
इरानबाट सुरक्षा खतरा भएको दाबी गर्दै अमेरिकाले गत हप्ता खाडी क्षेत्रमा अमेरिकी वमबर्षक विमान बी-५२ तैनाथ गरेपछि अमेरिका र इरानबीचको तनावले थप चर्को रूप लिएको हो । बेइजिङ भ्रमणका क्रममा इरानी विदेशमन्त्री जरिफले आफूले चिनियाँ अधिकारीसँग द्विपक्षीय सम्बन्ध तथा मध्यपूर्व क्षेत्रमा अहिले देखिएका ‘निकै खतरनाक विषय’बारे वार्ता गर्ने बताएको इरानी विदेश मन्त्रालयको वेबसाइटमा उल्लेख गरिएको थियो ।
रणनीतिक हिसाबले विश्वकै महत्त्वपूर्ण जलमार्ग मध्यपूर्वमा इरानले साना तथा परम्परागत डुङ्गाहरूमा इरानले क्षेप्यास्त्रलाई तयारी अवस्थामा राखेको तस्वीर भेटिएको जनाउँदै वासिङ्टनले खाडी क्षेत्रमा धेरै सैन्य समूह तैनाथ गरेको समाचारमा जनाइएको छ । अमेरिकी विदेश विभागले गत बुधबार इराकस्थित आफ्नो राजदूताबास तथा महाबाणिज्यदूताबासमा इरानी निर्देशनमा सिया लडाकूले आक्रमण गर्नसक्ने भन्दै कार्यालय खाली गरी धेरैजसो अधिकारीलाई अन्यत्र लग्न निर्देशन दिएको थियो ।
इरानले बिहीबार अमेरिकासँग वार्ता नगर्ने बताएको थियो तर उसले आफ्नो पक्षबाट ‘अधिकतम लचकता’ देखाएको बताएको थियो । मध्यपूर्वमा बढ्दो तनावबीच इरानी विदेशमन्त्री जरिफले अन्तर्राष्ट्रिय समुदायसँग ‘जोइन्ट कम्प्रिहेन्सिभ प्लान अफ एक्सन- २०१५’ नामक आणविक सम्झौतालाई जोगाउन आग्रह गरेका छन् ।
सम्झौता चीन, रूस, जर्मनी, बेलायत, फ्रान्स र संयुक्त राज्य अमेरिकासँग पूर्व अमेरिकी राष्ट्रपति बाराक ओबामाको पहलमा गरिएको थियो । यसका कारण इरानमाथि त्यसअघि लगाइएका अन्तर्राष्ट्रिय प्रतिबन्धलाई विस्तारै सहज बनाउँदै लगिएको थियो । तर गत वर्ष अमेरिकी राष्ट्रपति डोनाल्ड ट्रम्पले सम्झौता अमेरिकालाई मान्य नहुने भन्दै यसबाट फिर्ता भएको घोषणा गर्नुभएको थियो । सम्झौताबाट फिर्ता भएसँगै अमेरिकाले इरानमाथि लगाउँदै आएको प्रतिबन्धका साथै थप नयाँ प्रतिबन्धको समेत घोषणा गरेको छ ।
-1732776560.jpg)
