काठमाडौं : त्रिवि सेवा आयोगको गेटमा गएराती कालो मोसोले सेवा आयोगविरुद्ध नाराबाजी लेखिएको छ । सोमबार मोहन वैद्य र नेत्रविक्रम चन्द विप्लव निकट विद्यार्थी संगठन अखिल (क्रान्तिकारी) ले तालाबन्दी गरेको थियो ।
सेवा आयोगमा गरिएको ताला फुटाएपछि राति कालो मोसोले सेवा आयोगका अध्यक्ष चैतन्य शर्माको राजीनामा, आफन्त भर्ना प्रक्रिाया खारेज र त्रिवि सेवा आयोग खारेजको माग गरिएका नारा लेखिएको पाइएको छ ।
सोमबार लगाएको ताला तोडेपछि त्यसैको अर्को चरण अन्तर्गत कालो मोसो दलिएको स्रोतले जनाएको छ । खुल्ला प्रतिस्पर्धाको परीक्षामा नातेदारलाई पास गराएको भन्दै विद्यार्थीहरूले तालाबन्दी गरेका हुन् ।
सेवा आयोगले लिएको खुल्ला प्रतिस्पर्धामा त्रिविकै उच्च पदाधिकारी, विद्यार्थी संघसंगठनका पहुँचवाला नेता र विभिन्न राजनीतिक पार्टीका नेताका नातेदारहरूको नाम निकालिएको सूची सार्वजनिक भएको छ । वैशाख १३ गते नतिजा सार्वजनिक गरिएको थियो ।
सो नतिजाको विरोध गर्दैै त्रिभुवन विश्वविद्यालयको कीर्तिपुरस्थित सेवा आयोगको कार्यालयमा आइतबार दिउँसो तोडफोड भएको थियो । नतिजा प्रति असन्तुष्ट विद्यार्थीले तोडफोड गरेका थिए ।
तोडफोडबाट सेवा आयोग कार्यालयमा क्षति पुगेको थियो । नेपाल विद्यार्थी संघ र नयाँ शक्ति विद्यार्थी युनियनमा आबद्ध विद्यार्थीले तोडफोडसहित आयोगका अध्यक्ष चैतन्य शर्माको कुर्सी जलाएका थिए ।
लिखित परीक्षामा उत्तीर्ण हुनेमा धेरैजसो पहुँचवालाका आफन्त परेपछि अख्तियार दुरुपयोग अनुसन्धान आयोग र राष्ट्रिय सतर्कता केन्द्रमा उजुरी समेत परेको छ ।
त्रिविका कर्मचारी संघ संगठन र परीक्षामा सहभागी केही विद्यार्थीले आयोग, केन्द्र, कुलपति, उपकुलपति कार्यालयलगायत त्रिविकै विभिन्न निकायमा समेत उजुरी दिएका छन् ।
प्रकाशित मिति: मंगलबार, वैशाख ३१, २०७६
-1732776560.jpg)
