यांगुन : म्यानमारमा अगाडिको चक्का नखुलेकै अवस्थामा विमानचालकले एउटा यात्रुवाहक जेट विमान सुरक्षित रूपमा अवतरण गराएका छन् ।
म्यानमार नेशनल एअरलाइन्सको सो विमान म्यान्डले विमानस्थलको धावनमार्गमा रोकिनुअघि चिप्लिएको थियो । इम्ब्राअर १९० मोडलको सो विमानमा ८९ यात्रु सवार थिए ।
विमानलाई कुशलतापूर्वक अवतरण गराएकोमा विमानचालकको प्रशंसा गरिएको छ । म्यानमार नेशनल एअरलाइन्सका अनुसार विमान अवतरण गर्नुअघि एअर ट्राफिक कन्ट्रोलरहरूले विमानको चक्का खुले–नखुलेको ठम्याउन सकून् भनेर क्याप्टेन म्यान मो अङले विमानस्थलमाथि विमानलाई दुई फन्को घुमाएका थिए ।
यांगुनबाट म्यान्डलेका लागि उडेको सो विमानमा अवतरणको बेला त्यस्तो समस्या देखिएको थियो । वमानसेवाको भनाई छ, ‘विमानचालकले आपतकालीन प्रक्रिया पूरा गरेका थिए । उनले विमानको तौल घटाउनलाई धेरै इन्धनलाई आकाशमै खपत गराएका थिए ।’
विमान अवतरण गर्दा खिचिएको भिडिओमा विमानले अगाडिको भागले भुइँ छुनुअघि पछाडिको चक्कामा भर परेको देखिएको छ । विमान पूरै रोकिनुअघि धावनमार्गमा २५ सेकेन्ड घिस्रिएको थियो ।
‘विमानचालकले गज्जबको काम गरेका छन्,’ म्यानमारका यातायातमन्त्री विन खान्तले बताए ।
यसअघि गत बुधवार म्यानमारको अर्को विमानस्थलमा एउटा विमान चिप्लिएको थियो ।
विमान बंगलादेशको एउटा विमान खराब मौसमका कारण बित यांगुन अन्तर्राष्ट्रिय विमानस्थलमा अवतरण गर्दा चिप्लिएको थियो । सो घटनामा १७ यात्रु घाइते भएका थिए ।
प्रकाशित मिति: सोमबार, वैशाख ३०, २०७६
-1732776560.jpg)
