रियो दि जेनेरियो : भ्रष्टाचारको आरोप लागेका ब्राजीलका पूर्व राष्ट्रपति मिसेल टेमरले प्रहरी समक्ष आत्मसमर्पण गरेका छन् ।
आत्मसमर्पणपछि प्रहरीले उनलाई साओ पाउलोस्थित संघीय प्रहरीको हिरासतमा राखेको छ । पूर्व राष्ट्रपति टेमरलाई गत मार्चमा पनि चार दिन हिरासतमा राखिएको थियो ।
तर बन्दी प्रत्यक्षीकरण रिट जारी भएपछि उनी हिरासतबाट मुक्त भएका थिए । गत बुधबार अदालतले पुनः जेल चलान गर्न आदेश दिएपछि टेमरले आत्मसमर्पण गरेका हुन् ।
गत वर्षको अन्त्यमा राष्ट्रपतिको कार्यकाल सकिएको थियो । त्यसलगत्तै उनी भ्रष्टाचारसहितका आरोपमा मुछिएका छन् ।
उनीविरूद्ध भ्रष्टाचार गरेको, घुस लिएको र आपराधिक संगठनको नेतृत्व गरेको जस्ता कैयौं अभियोग लागेका छन् ।
आफूमाथि लागेका सबै आरोपहरू अस्वीकार गर्दै आएका पूर्व राष्ट्रपति टेमरले अदालतको आदेश खेदजनक भएको टिप्पणी गरेका छन् । त्यस निर्णयविरूद्ध माथिल्लो अदालतमा जाने उनको भनाइ छ ।
भ्रस्टाचारको अनुसन्धानका क्रममा लुला दा सिल्भापछि गिरफ्तार हुने उनी ब्राजिलका दोस्रा पूर्व राष्ट्रपति हुन् । टेमरकै सक्रियतामा ब्राजीलकी वामपन्थी राष्ट्रपति डिल्मा रुसेफविरुद्ध महाअभियोग लगाएपछि टेमर राष्ट्रपति बनेका थिए ।
रुसेफको कार्यकालमा उपराष्ट्रपति रहेका उनले रुसेफमाथि ब्राजीलको पेट्रोबास कम्पनीबाट ठूलो मात्रामा अनियमितता र भ्रष्टाचारको आरोप लगाएका थिए । तर पदबाट हट्नेवित्तिकै टेमर आफैं भ्रष्टाचारको मुद्दामा जेल पुगेका हुन् ।
प्रकाशित मिति: शुक्रबार, वैशाख २७, २०७६
-1732776560.jpg)
