काठमाडौं : नेत्रविक्रम चन्द विप्लव नेतृत्वको नेकपाका पोलिटब्यूरो सदस्य पादमबहादुर राई निलम्बित भएका छन् ।
माओवादीमा विकास उपनामले परिचित उनी पूर्वआवास तथा भौतिक योजना राज्यमन्त्री समेत हुन् । पार्टीको नीतिविपरित विभिन्न सञ्चारमाध्यममा प्रतिक्रिया दिएको भन्दै उनलाई निलम्बन गरेको सो पार्टी निकट स्रोतले जनाएको छ ।
उनल केही दिनअघि सरकारसँग वार्ता प्रक्रिया अघि बढिरहेको अभिव्यक्ति दिएका थिए । उनको यो भनाईपछि सबै जिम्मेवारीबाट निलम्बन गरिएको हो ।
शान्तिप्रक्रियापछि राई पहिलो संविधानसभामा भोजपुर क्षेत्र नम्बर १ बाट निर्वाचित भएका थिए । नेता राई तत्कालीन माओवादीनिकट किराती राष्ट्रिय मुक्ति मोर्चाका केन्द्रीय अध्यक्षसमेत भइसकेका छन् ।
माओवादी विभाजनका समयमा राईको नेतृत्वमा भोजपुर, खोटाङ र संखुवासभाबाट ठूलो समूह उनीसँगै विप्लवतर्फ लागेको थियो ।
गत वर्ष भएको प्रतिनिधि सभा र प्रदेश सभा निर्वाचनका क्रममा भोजपुरबाट चुनाव लडेका शेरधन राईमाथि बम हमला गरेको आरोप उनीमाथि लागेको थियो । प्रहरीले पक्राउ गरी मुद्दा चलाएपछि ६० हजार धरौटीमा रिहा भएका थिए ।
प्रकाशित मिति: बुधबार, वैशाख २५, २०७६
-1732776560.jpg)
