लाहोर : पाकिस्तानको लाहोरस्थित सूफी मुसलमानहरूको मस्जिदबाहिर भएको शक्तिशाली विस्फोटमा ८ जनाको मृत्यु भएको छ ।
विस्फोटमा परी ५ जना प्रहरी र ३ जना सर्वसाधारण मारिएको पाकिस्तानको डनन्युजले जनाएको छ । सो विस्फोटमा २६ जना घाइते भएको जनाइएको छ ।
जियो न्यूजले प्रहरीको एउटा गाडीलाई आक्रमणको तारो बनाइएको जनाएको छ । विस्फोटन भएको ठाउँमा ठूलो संख्यामा सुरक्षकर्मीहरू परिचालन गरिएको छ ।
शिया र सुन्नी दुवै सम्प्रदायका हजारौं मुसलमानहरू सो दरगाहमा प्रत्येक वर्ष जान्छन् । सो स्थलमा गैरमुस्लिमहरू पनि दर्शन गर्न जान्छन् । सन् २०१० मा सो दरगाहमा भएका दुई आत्मघाती विस्फोटनमा दर्जनौंको मृत्यु भएको थियो ।
इस्लाम धर्मअन्तरगत भए पनि सूफी सम्प्रदाय अनुसरण गर्ने मानिसहरूलाई कट्टरपन्थी लडाकुहरूले आक्रमण गर्ने गरेका छन् ।
प्रकाशित मिति: बुधबार, वैशाख २५, २०७६
-1732776560.jpg)
