रुक्मिणि रणसिंघे १९ वर्षकी मात्र थिइन् । छ महिनाअघि उनले आफूले प्रेम गरेको केटासँग विवाह गरिन् ।
रुक्मिणिको परिवारले यो विवाहलाई स्वीकार गरेन । किनकि उनका पतिको जात र रुक्मिणिको जात मिल्दैन थियो ।
जात नमिल्ने केटासँग रुक्मिणिले विवाह गरेपछि असमझदारी यति धेरै बढ्यो कि एक दिन रुक्मिणिका पिता, काका र मामा मिलेर उनी र उनका पतिलाई जिउँदै जलाइ दिए । आफ्नो परिवारप्रतिको आक्रोशको मूल्य रुक्मिणिले आफ्नो ज्यान दिएर चुक्ता गरिन् ।
महाराष्ट्रको अहमदनगरको यो घटनाले ‘अनर किलिङ’ को मामिलालाई फेरि एकपटक सबैका सामू ल्याइदिएको छ । रुक्मिणि अनुसूचित जाती (एससी) मा पर्ने पासी जातिकी हुन् भने उनका पति मंगेश अन्य पिछडा वर्ग (ओबीसी) मा पर्ने लौहार जातिका हुन् ।
रुक्मिणिका पिता र परिवारका अन्य सदस्यहरू यो विवाहको विरूद्ध थिए । तर मंगेशका परिवारका सदस्यहरूले भने यो विवाहलाई स्वीकार गरेका थिए ।
रुक्मिणिका देवर महेश रणसिंघेका अनुसार उनीहरूको विवाहमा रुक्मिणिको माइती पक्षबाट उनकी आमा मात्र आएकी थिइन् ।
महेशले भने, ‘विवाहपछि पनि रुक्मिणिका घरका सदस्यहरूले यो नाताको विरोध गरिरहेका थिए । मंगेश र रुक्मिणिलाई सडकमासँगै देख्दा उनीहरू धम्की दिन्थे । त्यसबाट हैरान भएर मंगेश र रुक्मिणिले गत फेब्रुअरीमा अहमदनगरस्थित परनेर प्रहरी चौकीमा उजुरी दर्ता गराएका थिए ।’
त्यस्तै खाले तनावकाबीच ३० अप्रिलमा रुक्मिणिका माता–पिताले उनलाई आफ्नो घर बोलाएका थिए । घर गएपछि उनीहरूले रुक्मिणिलाई पिटे ।
पिटाइ खाएपछि रुक्मिणिले त्यसै रात मंगेशलाई फोन गरेर परिवारका सदस्यहरूले आफूलाई पिटेको जानकारी दिइन् । उनले मंगेशलाई आफ्नो माइतीमा आएर लिएर जान आग्रह गरिन् ।
त्यसको भोलिपल्ट मे १ तारिखमा मंगेश रुक्मिणिको माइत पुगे । त्यसबेला उत्तरप्रदेशमा बस्ने रुक्मिणिका काका र मामा पनि त्यहाँ आएका थिए । त्यस दिन रुक्मिणिको विवाहलाई लिएर त्यहाँ ठूलै झगडा भयो ।
रुक्मिणिका काका र मामाले रुक्मिणि र उनका पतिलाई कुटपिट गरे । त्यसपश्चात् उनीहरूले दुवै जनालाई डोरीले बाँधेर पेट्रोल छर्किए अनि आगो लगाइदिए ।
उनीहरूले नव दम्पतीलाई बाँधेर आगो मात्र लगाएनन्, घरभित्र बन्द गरिदिएर बाहिरबाट ढोका समेत लगाइदिए ।
महेश रणसिंघेका अनुसार घरबाट आएको दर्दनाक चित्कार सुनेपछि छिमेकीहरू घटनास्थल पुगेका थिए ।
उनीहरूले एम्बुलेन्स बोलाएर मंगेश र रुक्मिणिलाई पुणे लिएर गए । उपचारका लागि ससून अस्पतालमा भर्ना गराए । तीन दिनपपछि ५ मे मा रुक्मिणिको मृत्यु भयो ।
उनलाई अस्पताल भर्ना गराउँदा रुक्मिणिको अवस्था गम्भीर थियो । उनको शरीरको ६० देखि ६५ प्रतिशत हिस्सा जलिसकेको थियो ।
ससून अस्पतालका चिकित्सकहरूका अनुसार मंगेशको अवस्था पनि गम्भीर भइसकेको छ । हाल उनको उपचार भइरहेको छ । मंगेशको शरीरको पनि ४० देखि ४५ प्रतिशतसम्म हिस्सा जलेको छ ।
रुक्मिणिको घर नजिकै बस्ने सञ्जय बेदीले भने, ‘घरबाट धुवाँ उडिरहको थियो तर ढोका बन्द थियो । हामीले ढोका फुटायौं र एम्बुलेन्सलाई फोन गर्याैं ।’
बेदीका अनुसार सो परिवारबारे उनलाई खासै जानकारी छैन । उनले उत्तर प्रदेशबाट आएको सो परिवार विगत ८ महिनादेखि त्यहाँ बसोबास गरिरहेको जानकारी दिए ।
परनेर प्रहरी चौकीमा यसबारे एउटा उजुरी दर्ता गरिएको छ । रुक्मिणिका मामा घनश्याम र काका सुरेन्द्र बाबुलाल भारती उर्फ बिल्लू पण्डितलाई गिरफ्तार गरिएको छ ।
अहमद नगरका प्रहरी मनीष कलवानियाले भने, ‘प्रहरीले रुक्मिणिका पिता रामा रामफल भारतीको खोजी गरिरहेको छ । घटनास्थलबाट प्रहरीले पेट्रोलको एक बोतलसहित अन्य सामानहरू बरामद गरेको छ । घटनाको जाँच अहिले जारी छ ।’
रुक्मिणिका देवर महेश भने प्रहरीले बेवास्ता गर्दा उनको परिवारले यस्तो भोग्नुपरेको आरोप लगाउँछन् ।
उनले भने, ‘हामीले रुक्मिणिको परिवारले मंगेश र रुक्मिणिलाई धम्की दिइरहेका छन् भनेर निक्सोज र परनेर प्रहरी चौकीमा उजुरी दर्ता गराएका थियौँ । गत फेब्रुअरीमा प्रहरीलाई धम्कीबारे बताएका पनि थियौँ । यो घटनाको ठीकअघि पनि हामीले लगातार धम्की पाइरहेको भनेर प्रहरीलाई खबर गरेका थियौँ ।’
उनलाई प्रहरीले चाँडै नै आफ्नी भाउजुको हत्यामा सामेलहरूलाई सजाय हुने र आफ्नो परिवारलाई न्याय मिल्ने आशा छ । बीबीसी
प्रकाशित मिति: बुधबार, वैशाख २५, २०७६
-1732776560.jpg)
