मुम्बई : भारतमा माओवादी विद्रोहीले गराएको बम विस्फोटमा परी बुधबार कम्तीमा १६ जना मारिएका छन् ।
विशेष सुरक्षा टोलीमा रहेका १५ जना र एक जना चालकको सो घटनामा परी मृत्यु भएको प्रहरीले जनाएको छ । दशकौँदेखि भारतमा भइरहेको माओवादी द्वन्द्वका कारण भएका घटनामध्ये बुधबारको घटना पनि ठूलो घटना मानिएको प्रहरी अधिकारीहरूको भनाइ छ ।
सन् १९६० को दशकदेखि सुरु भएको माओवादी द्वन्द्वका क्रममा भारतमा अहिलेसम्म दशौँ हजारको मृत्यु भइसकेको छ । चिनियाँ नेता माओत्से तुङबाट प्रभावित भएका विद्रोही र सुरक्षाकर्मीबीच भारतमा लामो समयदेखि भिडन्त र आक्रमणका घटना हुँदै आएका छन् ।
भारतको महाराष्ट्र राज्यमा माओवादी विद्रोहीले नै केही सवारी साधनमा आक्रमण गरेको सूचनाका आधारमा त्यसतर्फ जाँदै गर्दा उनीहरूले सुरक्षाकर्मीकै गाडीमा आक्रमण गरेको अधिकारीहरूले जनाएका छन् ।
महाराष्ट्रको गढचिरौलीमा घटना भएको हो । सो क्षेत्र माओवादी अतिप्रभावित क्षेत्र मानिन्छ । त्यसबाहेक भारतका झारखण्ड, पश्चिम बङ्गाल, उडिसा, बिहार, छत्तीसगढ, उत्तर प्रदेश, कर्नाटकलगायतका क्षेत्रमा पनि माओवादीको धेरै प्रभाव रहेको छ । भारतका प्रमुख आन्तरिक सुरक्षा चुनौतीमध्ये माओवादी विद्रोहलाई पनि लिइन्छ भने उनीहरू सङ्गठित भएर पूर्वी तथा मध्यभारतको ठूलो क्षेत्रमा फैलिँदै गएको पाइएको छ ।
-तस्बिर: बीबीसी हिन्दीबाट
-1732776560.jpg)
