विराटनगर : गत चैत २ गते विराटनगरको नोबेल मेडिकल कलेजछेउ एक व्यक्ति बेवारिसे अवस्थामा फेला परे । दैनिक हजारौँको संख्यामा ओहोरदोहोर गर्ने कलेजको सडकछेउ लडिरहेका ती व्यक्तिलाई धेरैले देखे ।
आफ्नो नाम समेत बताउन नसक्ने उनको अवस्था देखेर कसैले दया भाव राखेनन् । नजिकैको अस्पतालमा उपचार गर्न लानु त परै जाओस्, उनको त्यो अवस्थाको विषयमा कसैले प्रहरीलाई खबर पनि गरेनन् । तर प्रहरीको आफ्नै सक्रियताले ती व्यक्तिले नयाँ जीवन पाएका छन् ।
घाइते अवस्थामा फेला परेका ती व्यक्तिलाई नोबेल अस्पतालमा ड्युटीमा खटिएका प्रहरीले उद्धार गरेर मानवताको उच्च प्रदर्शन गरेका छन् । जिल्ला प्रहरी कार्यालय मोरङका अनुसार ती व्यक्ति को हुन् भन्ने अहिलेसम्म खुलेको छैन ।
चैत २ गते दिउँसो ११ बजे प्रहरीले उद्धार गरी उपचारका लागि अस्पताल लगेको थियो । तराईबासी चौधरी जस्तो देखिने ती व्यक्ति अन्दाजी ४५ वर्षका लाग्छन् । उनी अहिले पनि बोल्न नसक्ने प्रहरीको भनाइ छ ।
प्रहरीकै आग्रहमा ती व्यक्तिलाई नोबेल मेडिकल कलेजले निःशुल्क उपचार गरिदिएको थियो । जिल्ला प्रहरी कार्यालय मोरङको अनुरोधमा अस्पतालले आईसीयूमा भर्ना गरी उपचार गरेको थियो ।
अस्पतालका अनुसार उनको टाउकोमा रगत जमेका थियो । शल्यक्रियापश्चात् उनको स्वास्थ्यमा निकै सुधार आएको छ ।
बेवारिसे अवस्थामा रहेका उनको तस्बिर सार्वजनिक गर्दै उनलाई चिन्ने जो कोहीले आफन्तलाई खबर गरिदिन पनि प्रहरीले आग्रह गरेको छ ।
प्रकाशित मिति: मंगलबार, वैशाख १७, २०७६
