नयाँदिल्ली : भारतको तल्लो सदन लोकसभाका लागि चौथो चरणको मतदान सोमबार सुरु भएको छ । भारतीय निर्वाचन आयोगका अनुसार नौवटा राज्यका ७१ स्थानका लागि सोमबार मतदानका लागि त्यहाँ बिदा दिइएको छ ।
निर्वाचन आयोगका अनुसार, चौथो चरणको निर्वाचनमा १२ करोड ७९ लाख मतदाता रहेका र उनीहरूले ९४५ जना उम्मेदवारको भाग्यको फैसलाका लागि चर्चित बलिउड कलाकारहरूले मतदान गरेका छन् । भारतका धनाढ्य व्यक्तित्वहरू मुकेश अम्बानी र अनिल अम्बानीले मतदान केन्द्र पुगी मतदान गरेका छन् ।
बलिउडका ‘सुपर स्टार’ अमितताभ बच्चनका सम्पूर्ण परिवार, चर्चित बलिउड अभिनेता राकेश रोशनका सम्पूर्ण परिवार, आमिर खान, सलमान खान, अजय देवगण, रणवीर सिंहलगायत कैयौँ चर्चित कलाकारको मतदान केन्द्रमा उपस्थिति रहेको छ । चर्चित अभिनेत्री रेखा, हेमा मालिनी, माधुरी दीक्षित, काजोल, करिना कपुर, प्रियंका चोपडालगायत अभिनेत्रीहरूको बाक्लो उपस्थिति रह्यो मतदान केन्द्रमा ।
भारतीय प्रख्यात क्रिकेटर सचिन तेन्दुलकर पनि आफ्ना सम्पूर्ण परिवारसहित मतदान केन्द्र पुगी मतदान गरेका थिए । प्रधानमन्त्री नरेन्द्र मोदीले आमजनतालाई ट्विटरमार्फत् मतदानमा सक्रिय सहभागी हुन आह्वान गरेका छन् । यी सबै कलाकारले पनि सर्वसाधारणलाई आफ्नो मताधिकार सुरक्षित गर्न आह्वान गरेका थिए । बिहान ७ बजेबाट नै १० हजार मतदान केन्द्रलाई खुला गरिए तापनि सो समयमा नै लामो लाइन भएको समाचारमा जनाइएको छ ।
यता, बलिउड कलकारको मतदान केन्द्रमा बाक्लो उपस्थिति रहेको छ भने सर्वसाधारणको भने मतदान केन्द्रमा कम मात्र उपस्थिति रहेको समाचारमा जनाइएको छ । आमनिर्वाचनमा आमजनताको उपस्थिति नै निर्वाचनलाई सफलताको रूपमा लिन सकिन्छ । सात चरणको चुनाव सम्पन्न भएपछि मे २३ मा मतगणना हुनेछ ।
-1732776560.jpg)
