कोलोम्बो : गत साता श्रीलङ्कामा भएका शृङ्खलाबद्ध आत्मघाती विस्फोटपछि सरकारले अनुहार छोपिने खाले सबै प्रकारको कपडा लगाउन प्रतिबन्ध लगाएको छ । गत हप्ता तीन चर्च र तीन होटलमा भएका आतङ्ककारी आक्रमणपछि २५० बढी व्यक्तिको मृत्यु भएपछि अनुहार छोप्ने बुर्का जस्ता पहिरनलाई सोमबारबाट लागू हुने गरी प्रतिबन्ध लगाइएको श्रीलङ्का सरकारले आइतबार घोषणा गरेको छ ।
सोमबारदेखि लागू हुने उक्त प्रतिबन्धमा कुनै विशेष पहिरनको उल्लेख नगरिएको भए तापनि यस्तो प्रतिबन्ध मुस्लिम महिलाहरूले प्रयोग गर्ने पहिरन बुर्कालक्षित रहेको छ । आइतबार गरिएको यस निर्णयअनुसार अब कसैले पनि अनुहार छोपिने र पहिचानमा अवरोध हुने खालका पहिरन लगाउन नपाउने भएको छ । यसअघि नै श्रीलङ्काको संसदमा सुरक्षा कारण देखाइँदै बुर्कामा प्रतिबन्ध लगाउनुपर्ने आवाज उठ्ने गरेको थियो ।
श्रीलङ्काका राष्ट्रपति मैत्रिपाला सिरिसेनाले राष्ट्रिय सुरक्षाका लागि आकस्मिक उपायहरू अपनाइएको बताएका छन् । यस बुर्का प्रतिबन्धलाई पनि आकस्मिक उपायमध्येको एक भएको बताइएको छ । अनुहार छोप्ने यस पहिरनमा प्रतिबन्ध लगाउने सरकारको यो घोषणामा मुस्लिम महिलाहरूले लगाउने बुर्का वा ’निकाब’बारे प्रस्ट उल्लेख छैन तर यो उनीहरूप्रति नै लक्षित छ भन्ने स्पष्ट देखिन्छ ।
श्रीलङ्कामा धेरै मुस्लिम महिलाहरूले अनुहार छोपिने खालका पहिरन लगाउँदैनन् तर पछिल्ला वर्षहरूमा भने अनुहार ढाक्ने पहिरनप्रति आकर्षण बढेको पाइन्छ । श्रीलङ्कामा अनुहार छोप्ने खालका पहिरनमा प्रतिबन्ध लगाउने माग गरिँदै आएको भए तापनि गत अप्रिल २१ मा भएको भीषण आक्रमणपछि यस्तो प्रतिबन्ध लगाउनुपर्ने माग बढेको थियो ।
इस्लामिक स्टेट्स आतङ्ककारी समूहले जिम्मा लिएको त्यस भीषण आक्रमणमा परी २५० व्यक्तिको मृत्यु हुनुका साथै अन्य ५०० बढी घाइते भएका छन् । उक्त आतङ्ककारी आक्रमणमा परी करिब ४० विदेश नागरिकको पनि मृत्यु भएको छ । मारिएका ती विदेश नागरिकहरू भारत, डेनमार्क, चीन, टर्की, नेदरल्याण्ड र पोर्चुगलका रहेका थिए । इसाईहरूको पर्व इस्टरका दिन गिर्जाघर र होटलहरूमा बम विस्फोट गराइएको थियो ।
-1732776560.jpg)
