काठमाडौं : चेल्सीले इंग्लिस प्रिमियर लिगको शीर्ष चारमा रहँदै सिजन अन्त्य गर्ने सम्भावना बलियो बनाएको छ । चेल्सीले गएराति भएको खेलमा म्यान्चेस्टर युनाइटेडसँग १–१ गोलको बराबरी खेल्दै अंक बाँड्यो ।
युनाइटेडको मैदान ओल्ड ट्राफोर्डमा भएको खेलमा अग्रता भने म्यान्चेस्टर युनाइटेडले लिएको थियो । खेलको ११ औं मिनेटमा हुवाँ माटाले गोल गर्दै घरेलु टोलीलाई अग्रता दिलाएका थिए ।
तर पहिलो हाफको ४३ औं मिनेटमा मार्कस अलोन्सोले चेल्सीका लागि बराबरी गोल फर्काए । यो बराबरीपछि चेल्सीले ३६ खेलबाट ६८ अंक जोड्दै चौथो स्थानमा छ भने समान खेलबाट ६५ अंकसहित युनाइटेड छैठौं स्थानमा छ ।
प्रिमियर लिगकै अर्को खेलमा पाँचौं स्थानमा रहेको आर्सनलले लेष्टर सिटीसँग ३–० को हार भोगेपछि चेल्सीको शीर्ष चारको यात्रा सहज भएको हो ।
आइतबार राति भएको खेलमा लेष्टर सिटीलाई जिताउन जेमी भार्डीले २ र यउरी टिइलेमन्सले १ गोल गरे ।
प्रकाशित मिति: सोमबार, वैशाख १६, २०७६
