काठमाडौं : नेपाल भ्रमण वर्ष– २०२० अभियानअन्तर्गत भ्रमण वर्षको लोगोसहितको स्टिकर सार्वजनिक गरिएको छ ।
नेपाल भ्रमण वर्ष कार्यक्रम कार्यान्वयन उपसमितिले ‘समृद्ध नेपाल बनाऔँ, विश्वमा नेपाल चिनाऔँ’ तथा ‘गरौँ तयारी धुमधाम, पाहुनालाई गराऔँ घुमघाम’ भन्ने नारासहित स्टिकर तय गरेको हो । भ्रमण वर्षको लोगो तथा मूल नारा भिजिट नेपाल ‘लाइफ टाइम्स एक्सपरियन्स’ यसअघि नै सार्वजनिक भइसकेको थियो ।
मूल नारामा थप दुई नारा थपेर लोगोसहितको स्टिकर बनाइएको छ । पर्यटन बोर्ड परिसरमा आज आयोजित कार्यक्रमबीच संस्कृति, पर्यटन तथा नागरिक उड्डयन मन्त्रालयका सचिव मोहनकृष्ण सापकोटाले उक्त भ्रमण वर्षको लोगो र नारासहितको स्टिकर पर्यटक बस र माइक्रोमा टाँसेर उद्घाटन गरेका थिए । भ्रमण वर्षको देशव्यापी प्रचार गर्ने उद्देश्यले समितिले पर्यटक सवारी साधन तथा सार्वजनिक सवारी साधनमा टाँसिने जनाएको छ ।
नेपाल पर्यटक यातायात व्यवसायी संघ, पर्यटक ट्याक्सी व्यवसायी संघ तथा पर्यटन क्षेत्रका विभिन्न सङ्गठनका प्रतिनिधिलाई स्टिकर प्रदान गरिएको थियो । सो अवसरमा पर्यटन मन्त्रालयका सचिव सापकोटाले सरकारले भ्रमण वर्ष मनाएर बढीभन्दा बढी विदेशी पर्यटक आकर्षण गरी पर्यटनको माध्यमबाट मुलुकको आर्थिक समृद्धिमा टेवा पुर्याउने उद्देश्यका साथ अभियान सुरु गरिएको उल्लेख गरे । उनले नेपालको पर्यटन हालको १२ लाख हाराहारीको पर्यटक आवागमनलाई बढोत्तरी गर्दै आर्थिक गतिविधि बढाउने र रोजगारी सिर्जना गर्नेतर्फ मन्त्रालयले निजी क्षेत्रको साझेदारीमा काम अघि बढाउनेछ । सचिव सापकोटाले नेपाल पर्यटनका लागि विश्वकै आकर्षक र सुरक्षित गन्तव्य भएको सकारात्मक सन्देश प्रवाह गर्न पर्यटनका सकारात्मक सामग्री सम्प्रेषण गरी भ्रमण वर्षलाई सहयोग पुर्याउन सम्वद्ध सबैलाई आग्रह गरे ।
सरकारले भ्रमण वर्ष मनाउनका लागि तत्कालीन पर्यटनमन्त्री स्व. रवीन्द्र अधिकारीको संयोजकत्वमा मूल समारोह समिति गठन गरी व्यवसायी सुरज वैद्यलाई भ्रमण वर्ष राष्ट्रिय कार्यक्रम संयोजक बनाएको थियो । समितिले सचिवालय स्थापना गरी प्रवर्द्धधनात्मक काम अघि बढाएको छ । सरकारले नेपाल भ्रमण वर्ष- २०२० लाई उत्साहका साथ प्रभावकारी कार्यान्वयन गराउन प्रचार प्रसारका लागि सबै संयन्त्रलाई प्रभावकारी बनाउने निर्णय गरिसकेको छ ।
भ्रमण वर्ष मनाएर २० लाख पर्यटक भित्र्याउने लक्ष्य लिइएको छ । भ्रमण वर्षको पूर्व सुरुवात ‘सफ्ट लन्चिङ’ गत चैत ३० गते पोखराबाट गरिएको थियो । भ्रमण वर्षको औपचारिक सुरुआत सन् २०१९ को डिसेम्बरको अन्तिम दिन गरिने सचिव सापकोटाले जानकारी दिए ।
-1732776560.jpg)
