पाल्पा पाल्पामा पनि अब केबलकार सञ्चालन हुने भएको छ । तिनाउ गाउँपालिकादेखि बुटवल उपमहानगरपालिका रूपन्देहीसम्म जोड्ने गरी केबलकार सञ्चालनमा ल्याउने योजना अगाडि सारिएको लुम्बिनी केबलकार प्रालिका प्रोपाइटर तेजप्रसाद विकले बताए ।
तिनाउ– ३ वसन्तपुरमा माथिल्लो सबस्टेसन र बुटवल–३ बमघाटमा तल्लो सबस्टेसन रहने गरी करिब तीन किमीमा झन्डै १८ देखि २० केबलकार सञ्चालन गरिने प्रालिले जनाएको छ । पाँच वर्षअघि सर्वेक्षण भइसकेको त्यस क्षेत्रमा केबलकार सञ्चालनका लागि तीन अर्ब ५२ करोड लागत लाग्ने अनुमान गरिएको छ । वसन्तपुरमा कामेक्षा मन्दिर निर्माण र एक सय ५० कोठासहितको सुविधासम्पन्न होटल–रेस्टुरेन्टसमेत सञ्चालन गर्ने तयारी गरिएको प्रालिका प्रोपाइटर विकको भनाइ छ ।
रूपान्देही तथा पाल्पा क्षेत्रका बासिन्दालाई जतिसक्दो स्वरोजगार बनाउने र अधिकतम रूपमा पर्यटकलाई भित्र्याउने योजना प्रालिको छ । प्रदेश नम्बर ५ कै महत्त्वपूर्ण पर्यटकीय क्षेत्रका रूपामा विकास गर्दै लुम्बिनी आएका बाह्य तथा आन्तरिक पर्यटकलाई पाल्पासम्म ल्याउने योजनाले केबलकार सञ्चालन गरिने भएको हो । लुम्बिनी आएका पर्यटकलाई पाल्पाका पर्यटकीय क्षेत्रको अवलोकनपछि मात्रै पोखरा पुग्ने वातावरण मिलाइने तिनाउ गाउँपालिकाका अध्यक्ष ओमबहादुर घर्ती मगरले बताए ।
प्रदेश नम्बर ५ को मुख्य व्यापारिक केन्द्रका रूपमा परिचित बुटवल रूपन्देहीको सिमानाका रूपमा रहेको तिनाउँ गाउँपालिकामा रहेर ओझेलमा परेको सुकेताललगायत पाल्पाकै बहिरीदेवी सत्यवतीको विकासमा समेत नयाँ योजना ल्याउने तयारी रहेको विकले बताए । केबलकार सञ्चालनसँगै स्थानीय ६० प्रतिशत नागरिकलाई रोजगारी दिइने र पाल्पामा दैनिक १० लाख पर्यटक भित्र्याइने केबलकार प्रालिका प्रोपाइटर विकको धारणा छ ।
एसियाकै ठूलो त्रिशूल, पाल्पाली करुवा र ढाका तथा नेपालको ताजमहल रानीघाटको नामले पर्यटक पाल्पा आउने गरे पनि अब केबलकारबाट पर्यटकलाई आकर्षण गर्नु राम्रो भएको तिनाउका अध्यक्ष सारुको भनाइ छ । केबलकार सञ्चालनका लागि पाल्पा तथा रूपान्देही बुटवलका सरोकार पक्षको छलफलपछि अब छिट्टै शिलान्यास गरेर दुई वर्षभित्र काम सक्ने योजना छ । –रासस
प्रकाशित मिति: शुक्रबार, चैत २९, २०७५
-1732776560.jpg)
