सियोल : दक्षिण कोरियाको उत्तरपूर्वी तटीय क्षेत्रमा गत साता फैलिएको डढेलोबाट ४०० भन्दा बढी घर र ९२० भन्दा बढी पशुगोठ डढेर क्षतिग्रस्त भएको अधिकारीहरूले पुष्टि गरेका छन् ।
राष्ट्रिय सङ्कटकाल घोषणा गरिएको यस डढेलोबाट उत्तरपूर्वी क्षेत्रका पाँचवटा शहर नराम्रोसँग प्रभावित भएका थिए । कोरियाली इतिहासमै सबैभन्दा ठूलो मानिएको यो डढेलो सियोलबाट करिब १६० किलोमिटर उत्तरपूर्वको सानो शहर गोसिङ काउन्टीमा गत बिहीबार राती सुरु भएको थियो । हावाहुरी र सुख्खाका कारण तीब्र गतिमा विस्तार भएको आगो नजिकका अरू नगर इलाकामा फैलिएको थियो ।
दक्षिण कोरियाका राष्ट्रपति मुन जाए–इनले आपतकालीन स्थितिको घोषणा गर्दै दशौँ हजार खोज तथा उद्धारकर्मीलाई परिचालन गर्ने तथा १० वटा बढी हेलिकोप्टर परिचालन गर्ने आदेश दिएका थिए । हाल आगो नियन्त्रणमा आइसकेको छ ।
आगलागीबाट एक व्यक्तिको मृत्युसमेत भएको थियो । सरकारी विपद् निकायका अनुसार आगलागीबाट अरू व्यक्ति हताहत भएको खबर प्राप्त भएको छैन तर धनसम्पत्तिको ठूलो क्षति भएको छ । अधिकारीहरूले ७२२ जना विस्थापित व्यक्तिलाई २१ वटा आपतकालीन शिविरमा राखिएको जनाएका छन् ।
-1732776560.jpg)
