संसारका सबैभन्दा धनी अर्बपति व्यापारी जेफ बेजोसको सम्बन्ध बिच्छेद पनि संसारकै महगो हुने भएको छ ।
बेजोस आफ्नी पत्नी मक्केन्जीसँग सम्बन्ध बिच्छेदका लागि ३५ बिलियन अमेरिकी डलरको अर्थात करिब ३८ अर्ब नेपाली रुपैयाँ बराबरको रकम तिर्न सहमत भएका हुन् ।
सम्बन्धबिच्छेदपछि पनि मक्केन्जीसँग बेजोसको एमेजन कम्पनीमा चार प्रतिशत शेयर रहनेछ । केही महिनाअघि जेफ र मक्केन्जी आफ्नो २५ वर्ष लामो वैवाहिक जीवन अन्त्य गर्न सहमत भएका थिए ।
अर्बपति यो जोडीको सम्बन्धबिच्छेद पनि अहिलेसम्मकै महंगो हो । यसअघि कला व्यापारी एलेक विन्डेन्सटेन र उनकी पत्नी जोसलिनबीच भएको सम्बन्ध बिच्छेद ३.८ बिलियन डलरको थियो । जुन सबैभन्दा महंगो सम्बन्धबिच्छेद थियो ।
मक्केन्जीले ट्विट गर्दैै यो सहमति सार्वजनिक गरेकी छन् । जसमा उनले लेखेकी छन्, ‘एकअर्काको सहायतामा जेफसँगको विवाहलाई भंग गर्ने प्रक्रिया सकिएकोमा कृतज्ञ भएकी छु ।’
जेफ बेजोससँग एमेजनको १६.३ प्रतिशत शेयर छ । जसको ७५ प्रतिशत अब उनीसँग रहनेछ । मक्केन्जीले आफ्नो सेयरको मताधिकार पूर्वपतिलाई नै दिएकी छन् ।
सन् १९९४ मा जेफले एमेजन स्थापना गरेका थिए । मक्केन्जी त्यसको स्थापनाकालदेखि नै यसका काम गर्दै आएकी थिइन् । अमेरिकी सेयर बजारका एमेजनको कुल मूल्य ७ सय ९७ अर्ब डलर पुगेको छ ।
जेफ सफल ब्यापारी हुन् भने मक्केन्जी एक सफल लेखिका हुन् । मक्केन्जी सन् २००५ मा ‘द टेस्टिङ अफ लुथर अल्ब्राइट’ र सन् २०१३ मा ‘ट्र्याप्स’ नामक उपन्यास लेखेकी छन् ।
जेफ पछिल्लो समयमा फक्स टीभीकी एक सञ्चालिका लरेन सान्चेजसँग प्रेममा रहेको अमेरिकी सञ्चारमाध्यले समाचार प्रकाशन गरेका छन् । सो समाचार बाहिर आएपछि जनवरीमा संयुक्त विज्ञप्ति जारी गर्दै जेफ र मक्केन्जीले सम्बन्ध बिच्छेद गर्न लागेको जानकारी गराएका थिए ।
प्रकाशित मिति: शुक्रबार, चैत २२, २०७५
-1732776560.jpg)
