काठमाडौं : भूमि व्यवस्था, सहकारी तथा गरिबी निवारणमन्त्री पद्माकुमारी अर्यालले सहकारीमा आबद्ध जनशक्तिलाई सीपमूलक तालिम दिएर उत्पादनमा लगाउन आग्रह गरेकी छन् ।
६२औँ राष्ट्रिय सहकारी दिवसको अवसरमा काठमाडौं जिल्ला संघ, काठमाडौं जिल्ला वचत संघ, राष्ट्रिय सहकारी विभागलगायतका संघसंस्थाहरूले आयोजना गरेको कार्यक्रममा बोल्दै मन्त्री अर्यालले सहकारीकर्मीहरूलाई त्यस्तो आग्रह गरेकी हुन् । व्यावसायिक सहकारीलाई मन्त्रालयले प्रोत्साहन स्वरूप अनुदान दिने व्यवस्था गरेको भन्दै मन्त्री अर्यालले सहकारीमार्फत् मान्छेको जीवनस्तर सुधार्नका निम्ति आग्रह गरिन् । सहकारीमार्फत् हामीले मान्छेको जीवनस्तर सुधार्ने हो, तपाईंहरू त्यसतर्फ लाग्नुहोस् , मन्त्री अर्यालले भनिन्, सहकारीमा आबद्ध सदस्यलाई सीपमूलक तालिम दिएर व्यावसायिक बनाउनुहोस् । उनीहरूलाई उत्पादन वृद्धि गर्ने कार्यमा लगाउनुहोस् ।
सहकारी अब उद्योग, पर्यटन, कृषिमा जानुपर्ने भन्दै मन्त्री अर्यालले सहकारी आफ्ना सदस्यहरूको जीवन बदल्ने अस्त्र बन्नुपर्ने बताइन् ।
मन्त्रालय अहिले सहकारी क्षेत्रको निर्माणको दिशामा रहेको भन्दै उनले अहिले सहकारीको संख्या आवश्यकताभन्दा धेरै भएको गुनासो आइरहेका बेला त्यसको मर्जिङ गर्ने कार्यमा मन्त्रालय अगाडि बढेको जानकारी दिइन् ।
उनले अहिले भएका सहकारीको संख्यालाई कम गरेर आधाभन्दा कम गरिनेसमेत बताइन् । उनले भनिन्, सहकारीको संख्या अहिले अत्यधिक छ। यसलाई मर्जर गर्ने अभियानमा हामी लागेका छौँ । अबको पाँच वर्षमा अहिलेका सहकारीको संख्या ५० प्रतिशतमा झार्ने योजनामा मन्त्रालय अगाडि बढेको छ ।
मन्त्री अर्यालले सहकारी बढीभन्दा बढी गाउँ केन्द्रित हुनुपर्ने बताइन् । सहकारी शहरमा बढी भए भन्ने आरोप आइरहेका बेला अब सहकारी गाउँ केन्द्रित भएर उत्पादनमा लाग्नुपर्ने उनको धारणा थियो ।
मन्त्रालयले भर्खरै बजारीकरणको कार्यक्रम सुरु गरेको भन्दै मन्त्री अर्यालले यसलाई काठमाडौं आसपास हुँदै देशैभर विस्तार गरिने बताइन् । सहकारीलाई उद्योगमा लगेर गरिबी न्यूनीकरणका निम्ति प्रमुख कार्य गरिने भन्दै उनले सातै प्रदेशका सबैभन्दा बढी गरिब भएका पालिकाहरूमा गरिब लक्षित कार्यक्रम सञ्चालन गरिनेसमेत बताइन् ।
एउटा पालिका एउटा सहकारीले जिम्मा लिनेगरी समृद्धिको अभियान सञ्चालन गरिने भन्दै मन्त्री अर्यालले अबको समृद्धिको आधार भनेको सहकारी नै भएको दाबी गरिन् ।
प्रकाशित मिति: बुधबार, चैत २०, २०७५
-1732776560.jpg)
