संखुवासभा : पूर्वी पहाडी जिल्ला संखुवासभामा वर्षासँगै परेका असिनाले बालीनाली नष्ट गरेको छ ।
वर्षासँगै परेको असिनाले संखुवासभाको विभिन्न क्षेत्रको बालीनालीमा क्षति पुर्याएको हो । सोमबार दिउँसोदेखि रातिसम्म परेको असिनाले हिउँदे बालीसँगै फलफूल र अलैँची बालीमा क्षति गरेको हो । असिनाले संखुवासभाको मकालु गाउँपालिका, खाँदबारी नगरपालिकाका केही वडा, पाँचखपन नगरपालिका लगायतका क्षेत्रमा लगाइएको बालीनालीमा क्षति गरेको कृषकले बताएका छन् ।
मकालु गाउँपालिकाका वसन्त गुरुङका अनुसार असिनाले गहुँ, तोरी, तरकारी, आँप, लिची, अलैँची लगायतका बालीनाली नष्ट गरेको छ । असिनाका कारण लगाएको बालीनालीमा क्षति पुगेपछि कृषक चिन्तित छन् । असिनाले गरेको क्षतिका विषयमा प्रविधिकहरू सम्बन्धित ठाउँमा गएर बुझ्ने कृषि ज्ञान केन्द्र संखुवासभाले जनाएको छ ।
प्रकाशित मिति: बुधबार, चैत २०, २०७५
-1732776560.jpg)
